Чертуш авылы фермеры Разил Ситдыйков грант акчасына яңа ферма төзегән

Без «Эш башлаучы фермер», «Гаилә терлекчелек фермасы» һәм «Агростартап» программалары нигезендә авыл хуҗалыгы бизнесын үстерү буенча грантлар откан авыл эшмәкәрләре турында басмаларны дәвам итәбез.

2019 елда «Гаилә терлекчелек фермасы төзү» программасы буенча Чертуш авылыннан Рәзил Ситдыйков грантка ия булган. Грантның гомуми суммасы - 6 млн. сум, шул исәптән 4,2 млн. сум – дәүләт ярдәме, ә 1,8 млн. сум – эшмәкәрнең үз акчасы.

Гомумән, Ситдыйковлар гаиләсе авыл хуҗалыгы бизнесы белән 10 елдан артык шөгыльләнә.

-Барысы да әтием Рамилнең МТЗ - 80 тракторы сатып алуыннан башланды һәм без үз йортыбызда әкренләп МЭТне, бигрәк тә сыерлар санын арттыра башладык, - дип сөйли Рәзил. - Аннары азык әзерләү мәсьәләсе килеп басты, әти-әниебез авылдашларыбызның пай җирләрен арендага ала башладылар. Шулай итеп эш башланып китте.

Вакыт узу белән Ситдыйковлар гаиләсе авыл хуҗалыгы бизнесы белән ныклап шөгыльләнергә ниятли. Район башлыгы Вячеслав Козловның да ярдәме тигән, ул йорттагы сарайны ферма итеп үзгәртергә һәм республика программаларында катнашырга тәкъдим иткән. Заявка район авыл хуҗалыгы идарәсе ярдәме белән бирелгән һәм  отылган грант акчалары МЭТнең баш санын арттыруга, техника сатып алуга һ. б. юнәлдерелгән.

Бүгенгесе көндә Ситдыйковлар гаиләсенең 220 гектар җире, ике МТЗ-80 тракторы, бер Т-150 тракторы, тагын ДТ-54 чылбырлы тракторы һәм «Нива» комбайны бар.

Азык җитәрлек әзерләнгән - 400 рулон печән, 100 рулон салам, 300 тоннага якын бөртек бар (быел уңыш гектарыннан 30 центнердан артык булган).

Фермер грант килешүе шартлары буенча ферма төзергә һәм кимендә 30 баш сөт сыеры сатып алырга тиеш. Хәзерге вакытта ферма төзелгән, буяу, суыткыч җиһазларын урнаштыру буенча бераз эшләр бар, ферма янында киртә абзар да төзелгән.

- Киләсе елның җәенә кадәр без яңа фермага 50 сыер кертергә тиеш, - ди Рәзил. –Безнең хуҗалыкта хәзер 50 баштан артык МЭТ бар, әмма мин грант акчасына, 30 баштан да ким булмаган күләмдә, күп сөт бирә торган нәселле сыерлар сатып алырга ниятлим. Тулы җитештерү куәтенә 2021 елның июлендә чыгарга планлаштырабыз.

Ситдыйковлар фермасы, чыннан да, гаилә фермасы булып тора. Әнисе Гөлсинә сыер саву аппаратлары белән оста эш итә, әтисе Рамил – киң профильле тәҗрибәле механизатор, хатыны Айгөл декрет ялында булса да, һәр эштә дә булыша. Сүз уңаеннан, Рәзил, яшь булуына карамастан (аңа нибары 27 яшь), инде өч баланың яраткан әтисе.

Ситдыйковлар гаиләсе, бизнесны үстерүдән тыш, Чертуш һәм Чаллы Башы халкыннан сөт җыю һәм сату белән дә шөгыльләнә. Көн саен заводка 3 тоннага якын сөт китерәләр, бу эш белән Рәзил һәм аның әтисе Рамил мәшгуль.

Авыл хуҗалыгы бизнесы белән шөгыльләнү авырмы, дигән сорауга Рәзил, җиңел түгел, әмма авырлыклардан куркырга кирәкми, дип җавап бирде. «Хезмәтне тиешенчә оештырганда, эшне күңел биреп башкарганда, нәтиҗәсе дә яхшы булачак»,- ди ул.

- Авыл хезмәте һәрчак авыр булды, әмма дәүләт ярдәм иткәндә, үз хезмәтеңнең нәтиҗәсен күргәндә, гаилә муллыгы арта барганда, канәгатьлек аласың, - дип билгеләп үтте әңгәмәдәшем. Һәм Ситдыйковлар гаиләсе ирешкәннәрдә тукталып калырга җыенмый – алар үз бизнесларын алга таба да үстерергә җыена.