Тубылгы Тау һәм Ленино артистлары игенчеләрдә кунакта булганнар

Тубылгы Тау һәм Ленино мәдәният йортларыннан килгән артистларны күрү, чәчүдә эшләүче механизаторларны бераз гаҗәпләндергән. Төшке ялга туктаган механизаторлар тамак ялгый-ялгый моңлы җырлар, нәфис сүзләр тыңлаганнар. Бу көтелмәгән концерт аларның күңелләрен күтәргән.

Басуда яңгыраган гармун тавышын бераздан трактор гөрелтесе алыштырган.

Әйе, язгы чәчү чорында һәркем үзеннән ниндидер өлеш кертергә тырыша. Чөнки ел әйләнәсе өстәлләребездән икмәк өзелмәсен өчен, язын аеруча тырышырга кирәк.

«Ял иткән механизаторлар кабаттан җиң сызганып эшкә керештеләр. Безнең җыр-биюләребез, җылы сүзләребез игенчеләрнең хезмәтенә дәрт өстәсен. Алдагы көннәрдә дә эшләрендә уңышлар теләп калабыз»,- дип яза Тубылгы Тау АМЙ мөдире Айгөл Вафина.