Хуш, мәктәп!

Яңа Чишмә районы мәктәпләрендә мөһим этапны тәмамлаган 130 укучы өчен «Соңгы кыңгырау» бәйрәме узды. Балалар башлангыч мәктәпне тәмамлап, урта звенога күчәргә әзерләнәләр, анда аларны яңа фәннәр, укытучылар һәм ачышлар көтә.

Бу көнне тантаналы линейкалар районның барлык мәгариф учреждениеләрендә узды. Традиция буенча, һәр чара дәүләт гимннары астында Россия һәм Татарстан флагларын күтәрү тантанасыннан башланып китте.

Башлангыч мәктәп белән хушлашу

Яңа Чишмә башлангыч мәктәбендә бу көн аеруча дулкынландыргыч булды, быел аны 42 укучы тәмамлый. Бәйрәмнең төп геройлары матур да, дулкынланган һәм бераз моңсу да иделәр.

Мәктәп директоры Ирина Лихачева чыгарылыш сыйныф укучыларына үгет-нәсыйхәт сүзе белән мөрәҗәгать итте, барлык укучыларның да укуны уңышлы тәмамлауларын билгеләп үтте.

- Балалар, сез тормыш юлыгызда мөһим бусаганы уздыгыз. Моннан дүрт ел элек сез бу ишектән шик һәм өметләр белән атлап кергән идегез. Бу чорда сез гаять зур юл үттегез: фән нигезләренә генә түгел, бәлки фикер йөртергә һәм үзара аңлашырга, ярдәмләшергә дә өйрәндегез. Бүген минем алда чыгарылыш сыйныф укучылары дип аталырга хокукларын исбатлаган укучылар тора, - дип ассызыклады Ирина Лихачева. - Сез яңа белемнәргә, катлаулырак фәннәр һәм урта мәктәптә көткән җитдирәк бурычларга әзер.

Директор үз хезмәттәшләренә аерым рәхмәт сүзләре җиткерде:

- Бүген әти-әниләр һәм башкалар алдында үз коллективыма зур хезмәтләре өчен олы рәхмәтемне белдерәсем килә. Бигрәк тә чыгарылыш сыйныф укытучыларына: сезнең сабырлыгыгыз, профессиональлек һәм балаларга чиксез мәхәббәтегез яктылык сыман һәр баланың юлын яктыртып торды. Кадерле коллегаларым, мин сезгә педагогик талантыгыз, укучыларга белем бирү һәм тәрбияләүдә компетентлылыгыгыз һәм хезмәтегез өчен ихлас рәхмәтемне белдерәм. Һәрвакыт шундый ук энергияле, шат күңелле, максатчан булып калуыгызны телим.

Ел йомгаклары һәм иң яхшыларны бүләкләү

Директор урынбасары Рәфисә Фәхретдинова үз чыгышында уку елына йомгак ясады һәм дипломнар белән бүләкләү тантанасын уздырды. Бүләкләргә зур уңышларга ирешкән, тырышлык, үҗәтлек һәм укуга намуслы мөнәсәбәт күрсәткән балалар лаек булды.

- Балалар, безнең мәктәптә алган белемнәрегездән тыш, сез дус булырга, авырлыкларны җиңәргә һәм уңышларга сөенергә өйрәндегез. Сез бер-берегезгә ярдәм итүче чын команда булдыгыз. Кадерле укучылар, кызыксынучанлык, активлык һәм яңа ачышларга омтылуыгыз өчен без сезгә рәхмәт белдерәбез. Үз алдына максат куярга һәм аларга ирешергә курыкмаучы укучылар сез хәзер, - дип мөрәҗәгать итте мәктәпне тәмамлаучыларга Рәфисә Фәхретдинова.

Ата-аналарга аерым рәхмәт сүзләре әйтелде:

 -Сез – безнең таянычыбыз. Мәктәп тормышында катнашуыгыз һәм ярдәмегез өчен рәхмәт. Сез балаларыгызга белем дөньясына беренче адымнарын ясарга булыштыгыз һәм бу юлда аларга даими ярдәм иттегез.

Бүгенге көндә мәктәпне 131 укучы тәмамлый. Айлар буена балалар төрле дәрәҗәдәге чараларда: иҗади конкурслар, проектлар, фән олимпиадалары, конференцияләр, акцияләр һәм ярышларда актив катнаштылар. Укучылар җиңүче, призер һәм катнашучы булдылар, аларның уңышлары атна саен мәктәп линейкаларында билгеләп үтелде.

Башлангыч сыйныфны тәмамлаучыларның ата-аналары укытучыларга рәхмәт белдерде, барысын да уку елы тәмамлану белән котлады һәм балаларга кызыклы каникуллар һәм яңа мәктәп юлында уңышлы старт алуларын теләделәр!

Соңгы кыңгырау чыңы – тантананың традицион кульминациясе булды. Аның яңгыравык тавышы бу уку елының тәмамлануын хәбәр итте һәм күптән көтелгән җәйге каникулларга старт бирде. Алда – өч ай якты тәэсирләр, яңа көч туплау вакыты, алар урта мәктәптә булачак казанышлар өчен, һичшиксез, кирәк булачак.