Яңа Чишмә балалар сәнгать мәктәбендә «Музыкаль Татарстан» һәм «Музыкаль Казан» дәресләре үткәрелгән

«Музыкаль Татарстан» дәресе Татарстан композиторларына багышланган иде. Балалар Нәҗип Җиһанов, Фәрит Яруллин, Салих Сәйдәшев, Рәшит Кәлимуллин һәм республикабызның башка композиторлары иҗаты белән танышканнар. Укучылар һәм укытучылар фортепиано, баян һәм гитарада татар музыкасын башкарганнар.

«Музыкаль Казан» дәресендә БСМ укучылары республикабыз башкаласының төрле мәдәният һәм сәнгать учреждениеләре белән танышканнар. Болар – К. Тинчурин исемендәге Татар драма театры, Г. Камал исемендәге театр, «Пирамида» мәдәни - күңел ачу үзәге һәм цирк, Казан дәүләт филармониясенең концертлар залы, И. Әүхәдиев исемендәге музыка көллияте, Татар дәүләт гуманитар-педагогика университетының музыка факультеты, Н. Җиһанов исемендәге Казан консерваториясе, Казан дәүләт мәдәният һәм сәнгать университеты. Аларның биналары видеопрезентациядә күрсәтелгән. Дәрестә балалар бик теләп җырлаганнар, биегәннәр һәм музыкаль инструментларда татар көйләрен башкарганнар.