Яңа Чишмә районында коронавируска каршы вакцинация бара

- Районда вакцина бар һәм барлык теләүчеләр прививка ясау өчен РҮХнә мөрәҗәгать итә алалар, ул бушлай эшләнә, - дип билгеләп үтте атналык планеркада РҮХнең баш табибы вазыйфаларын башкаручы Наталья Роменская.

Бүгенгесе көндә Татарстанда 2500 кеше коронавирустан прививка ясаткан.

Вакцинация коронавирустан саклану өчен иң ышанычлы ысул булып тора. Безнең республикада коллектив иммунитетны формалаштыру өчен халыкның 60-70 %на прививка ясатырга кирәк. Яхшы оештырылган вакцинация коронавирус инфекциясен җиңәргә мөмкинлек бирәчәк.

Россиядә хәзер ике төр вакцина - «ЭпиВак-Корона» һәм «Спутник V» бар, икесе дә нәтиҗәле һәм куркынычсыз (Яңа Чишмәдә «Спутник V» вакцинасы белән прививка ясыйлар).

Роспотребнадзорның баш белгече Гөлфирә Мостафина районда коронавирус вазгыяте турында сөйләде. Пандемия башыннан бирле район буенча авырулар саны 46 кеше тәшкил итә, 39ы савыккан, кызганычка каршы, ике авыру үлгән.

13 гыйнварга 5 кеше авырый, алар белән элемтәдә булган 13 кеше изоляциядә.

Авыруларның географиясе түбәндәгечә: Яңа Чишмәдә - 18 очрак, Петропавел Бистәсендә – 7, Тубылгы Тауда - 4, калган торак пунктларда – 1-2шәр очрак. Авыручыларның иң күп саны – 30дан 50 яшькә кадәр – 20 кеше, 60 яшьтән өлкәнрәк – 9 очрак, 17дән 30 яшькә кадәр – 3 очрак.