Үзара салым – бу бик шәп!

Планлаштырылган эшләрне башкарып чыгу өчен бу яхшы ярдәм.

- Әйтик, Екатерина Бистәсендә урнашкан чишмәне төзекләндерүгә (чыгу юлы һәм баскыч ясалган) 25 мең сум акча тотылган. Яңа Иванаево авылында Бөек Ватан сугышында катнашучыларга куелган һәйкәлгә мемориаль такта әзерләүгә 20 мең сум акча тотылган. Су белән тәэмин итү системасы объектларына хезмәт күрсәтү һәм агымдагы ремонт, су буенча проект-тикшеренү эшләрен әзерләү, Екатерина Бистәсендә һәм Яңа Иванаевода скважиналарны лицензияләү буенча башкарылган эшләргә һәм хезмәт күрсәтүләргә 150 мең сум акча тотылган.  Ә бу скважиналарны киртәләү (50 мең сумлык), суның сыйфаты булмау сәбәпле, туктатылды, - дип сөйли авыл җирлеге башлыгы Александр Хорьков.
Екатерина Бистәсендә Совет урамында 84 метр озынлыктагы юлга вак таш салу 465 мең сумга, ә Яңа Иванаеводагы Болын урамы буенча 24 метр озынлыктагы юл 101 мең сумга төшкән. Урамнарны төзекләндерү (ягулык-майлау материаллары, килешүләр буенча эш өчен түләү һ.б.) буенча 44960 сумлык эш башкарылган, кышкы вакытта урам юлларын кардан чистартуга 100 мең сумлык килешү төзелгән.
- Бу эшләрнең башкарылуына карата безнең җирлектә яшәүчеләрдән дәгъвалар һәм шикаятьләр булмады, димәк, халык шулай ук үз акчаларын үзара салымга, авылны төзекләндерүне дәвам итү өчен дә актив кертәчәк, - дип дәвам итә авыл җирлеге башлыгы.
Авылда яшәүче Ирина Коробочкина аның белән килешә, беренчедән, су белән хәл ничек яхшырган. "Үзара салым керткәннән соң бездә су белән проблема юк. Әгәр су саркып югала икән, ремонтчылар беренче чакыруга ук киләләр һәм кимчелекләрне бетерәләр. Ә быел «Кытай» чишмәсе матур, уңайлы итеп төзекләндерелде, карыйсың да, бу изге эшкә үз өлешеңне кертүең белән горурланасың», - ди ул.
Картлардан Ирина чишмәнең мондый исеме каян килеп чыкканлыгын белгән.  Бер риваять буенча әлеге чишмә авыл читендәге күп балалы гаиләләр (8-9 бала) яшәгән урамда урнашкан.  Урам балалар белән тулы булганга, авыл халкы: «Монда халык Кытайдагы кебек», - дип шаярткан.  Чишмәгә «Кытай» исеме дә менә шуннан чыгып бирелгән.
- Күрәсез, чишмәнең экологик кына түгел, тарихи кыйммәте дә бар, - ди Нина Сафина. Ул авылның җиде ел элек үзе килеп урнашкан вакыттагы торышын һәм бүгенгесен чагыштыра. - 2012 елда кышкы кар көртләреннән башлыйм, ул чакта авыл юллары зур авырлык белән чистартылды, кирәк чакта район үзәгенә төшкә таба гына чыгып китә ала идек. Хәзер исә теләсә кайсы вакытта юллар чистартылган. Ә җәй көне авылда чүп үләннәре баскан җирләр юк диярлек, ә бу матур гына түгел, куркынычсыз да, балалар мәйданчыгы төзелгән, зиратлар төзекләндерелгән, быел Бөек Ватан сугышында һәлак булганнар истәлегенә куелган һәйкәлне төзекләндерделәр, урам юлларына вак таш җәелгән. Үзара салым – бу бик шәп! - бу хакта иң югары трибунадан әйтергә әзермен, - дип сүзен тәмамлады Нина Петровна.
Лариса ФЕДОРОВА