“Балаларыбызның хыяллары чынга ашсын”

Аны Яңа Чишмәдә сатып алырга булалар. Йортны сайлаганда, аның балалар бакчасы, мәктәп һәм башка ярдәмче балалар учреждениеләре булган үзәк тирәсендә урнашкан, ә йорт янында үз планнарын тормышка ашыру өчен буш урын булуын телиләр. Ә планга, беренчедән, балалар туу (ким дигәндә, дүрт), ә алга таба, торакны киңәйтү, балалар өчен күңел ачу урыннарын төзекләндерү һәм, әлбәттә инде, бакча булдыру керә.
Бүген Темниковлар гаиләсе Яңа Чишмәдә үз йортында яши һәм анда дүрт түгел, ә биш бала тәрбияләнә.  
Гаилә башлыгы-әтиләре Александр Александрович, мөмкин булганча, торак мәйданын арттырып, шушы һәм тормыш өчен кирәкле башка максатларга акча эшләп, нефть оешмаларының берсендә бораулаучы булып эшләп, йортны төзекләндерә. Әниләре Надежда Вячеславовна бу йортта уңайлылык тудыра, ашарга әзерли, дәвалый, өйрәтә, тәрбияли, кайчагында орыша һәм шунда ук балаларын жәлли. Кыскасы, ул әни булып эшли. Һәм, әйтергә кирәк, тырышып эшли. Бу эшкә йомгак ясарга иртә әле, әмма кайбер нәтиҗәләр бар.
Өлкән Степанга июнь аенда 11 яшь тулган. Ул бишенче сыйныфта укый. Аның мавыгулары музыкадан һәм рәсем сәнгатеннән алып (балалар сәнгать мәктәбендә шөгыльләнә) чит телләрне өйрәнүгә кадәр (тик менә укытучылары гына гел үзгәреп тора), әтисе белән электротехника белән шөгыльләнә (велосипедын мөстәкыйль рәвештә яктырткыч белән җиһазлаган). Мәктәптә ул бик яхшы укый, фән олимпиадаларында катнаша, 4 ел эчендә мәктәптә 41 Мактау грамотасы белән бүләкләнгән. Аңа башкача ярамый, чөнки ул адвокат яки прокурор булырга хыяллана. Шуңа күрә күп яклап камилләшергә тырыша. - Энем Гришка да калышмый, ул миннән 1 сыйныфка түбән укый, аның да инде 21 грамотасы бар, мине узып китәр ахыры, - дип шаярта Степа.
Гриша дүртенче сыйныфта укый, аңа барыннан да бигрәк телләрне (татар, рус, инглиз, хәзер немец телләре) өйрәнү ошый, математика һәм спортны да ярата.  Әтиләре һәм өлкән абыйсы белән бергә алар кыш көне чаңгы ярышлары оештыралар, ә җәен, бөтен гаиләләре белән балык тотарга барганда, балык саны һәм тиз йөзүдә дә ярыша алалар. «Әлегә әти җиңсә дә, без аның артыннан калышмаска тырышабыз», - диләр малайлар.
Гриша футбол һәм баскетбол белән җитди шөгыльләнә, ул актив, хәрәкәтчән егет, аның футболчы яки хәрби булу хыялын үтәү өчен барлык физик күрсәткечләре дә бар, «музыкалка» га да йөри. Зур баянда уйнарга өйрәнә, тырышып ноталар җыя.
Быел Ярослав беренче сыйныфка киткән. Мәктәпкә ул зур теләк белән барган, өлкән абыйлары белгәнне белергә генә түгел, ә хәзер ул гимназиядә көн саен ике туган абыйсы Данила һәм сеңлесе Мирослава белән очрашачак. Тагы бер туганы – Лера да беренче сыйныфка киткән, тик ул урта мәктәптә укый. Димәк, Темниковлар-Михайловлар - Елесиннарның быелгы елы күңелле вакыйгаларга бай булачак. Ярославның әлегә бер хыялы гына - яхшы укырга. Барысы белән дә кызыксына: абыйлары күк баянда уйнарга өйрәнергә дә, сеңлесе Аня күк рәсем ясарга да ошый аңа.
Аняның (аңа 18 сентябрьдә 5 яшь тулды) карандашлары һәм буяулары – төп инструментлар: ул үзенә ни ошый, барысын да ясый: әтисен, әнисен, ир туганнарын,  чәчәк һәм бал кортларын, шул ук вакытта җырлый да. Әнисенә кухняда ярдәм итәргә ярата, ә аны моның өчен мактаулары аңа тагын да күбрәк ошый. Аня күп кенә рус халык җырларын белә һәм аларны хисләнеп җырлый.
Ике яшьлек Яков - бөтен гаиләнең яраткан кешесе – әлбәттә, киләчәккә булган фикерләрен белдерә белми, әлегә ул үз теләкләрен генә җиткерә. Ә аның теләкләре шундый: «Барлык игътибар – миңа» «Әти минеке, әнием минеке», «Мин дә телим», «Мин үзем». Һәм менә бу «Мин үзем» диюе аның сыдырылган тезләрендә, маңгаендагы шешләрендә ап-ачык чагыла. Авыртуы ничек кенә каты булмасын, ул зарланмый да, еламый да, киресенчә, әнисеннән сызлавын яшерергә тырыша.
- Барлык балаларыгыз да музыкаль, музыкага мәхәббәт каян килә соң? – дигән сорауны әти-әниләренә бирәм.
- Бу безнең әтидән, - ди Надежда.  - Ул җырларга ярата, һәрвакыт баянда уйнарга өйрәнергә хыялланган, әмма аның балачагында андый мөмкинлек булмаган. Александрның хыялы безнең улларыбызда тормышка ашты, алар өйрәнә, аларның барысы да килеп чыга һәм ул аларның уңышларына шатлана. Хәзер аның хыялы үзгәрде һәм ул минеке белән тулысынча туры килә – безнең балаларның хыяллары чынга ашсын иде.
Лариса ФЕДОРОВА.
Автор фотосы