Бар да бар иде
Шимбә көнне үткән ярминкәдә шәхси хуҗалыклар һәм авыл хуҗалыгы оешмалары җитештергән күп төрле продукция сатылды. Бу көнне иң үтемле товар: ит, яшелчә, җиләк-җимеш булды. Евгений СТАРОВ
Продукция билгеләнгән вакыттан алдарак, иртән иртүк сатыла башлады. Шәхси хуҗалыклардан китерелгән 1010 кг сыер ите белән 630 кг дуңгыз ите (үтемле бәядән) бик тиз сатылып бетте. Ит һәркемгә дә җитешмәде, шунлыктан халык соравы буенча, шимбә көнне ярминкә дәвам иттереләчәк. Ярминкәдә дуңгыз мае, каз түшкәсе сатып алырга мөмкин иде, эшмәкәр Фәрит Курмаевның "Мясная лавка" кибете тавык итенең күп төрләрен тәкъдим итте. КМС заводы продукциясенә дә ихтыяҗ зур булды, аеруча килограммы 150 сумнан сатылган ак май үтте, ә менә бүлеп сатыла торган сөтне, шәхси хуҗалыклардан алып килгәнен дә әлләни алучы булмады.
Бал сатып алучылар да аз иде, халык кышка запас туплаган күрәмсең. Балык, колбаса, икмәк-күмәч, кондитер эшләнмәләре сатып алырга көмкин иде. Алма, виноград әйбәт сатылды. Берничә мәктәп үзе үстергән яшелчә тәкъдим итте, прилавкаларда матур итеп бизәлгән иде. Кыйммәт булуына карамастан, Башкортстаннан китерелгән бозаулар (16-20 мең сумлык), фермер Савельев китергән дуңгыз балалары (2 шәр мең сумнан) үз хуҗаларын бик тиз таптылар. "Архангельское" КФХ" ҖЧҖдән бодай төяп килгән беренче машина бик тиз бушады (килограммын 5 сумнан), аннан соң "Татарстан" агрофирмасының Әдәмсә бүлекчәсе, фермер Фәргать Вәлиев - бодай, фермер Николай Скоков солы саттылар. Прессланган печән һәм салам сатып алучы булмады, халыкның быелгысы елга запасы шактый ук хәзерләнгән, күрәмсең.
Яңачишмәлеләрнең күпчелегенә һәм район кунакларына ярминкәдә сайлап алу мөмкинлеге зур булды, кайнар шашлык, пешкән тәм-томнар, кайнар чәй яисә кофе дә бар иде. Бу көнне 740 мең сумлык товар сатылды, ярминкәдә 36 эшмәкәр катнашты.
Мәдәният бүлеге менә дигән концерт программасы хәзерләгән, алар ике сәгатьтән артык яңачишмәлеләрне үзләренең чыгышлары белән сөендерделәр.
Следите за самым важным и интересным в Telegram-каналеТатмедиа
Подписывайтесь на наш Telegram-канал "Шешминская новь"
Нет комментариев