Болар барысы да аның турында

«Кеше – үз сүзенең һәм эшенең хуҗасы», «Кеше – мәрхәмәтле йөрәк», «Кеше – матурлык төзүче», «Кеше - традицияләрне саклаучы» - болар барысы да аның турында, бүгенге юбиляр турында, аның белән якыннан таныш һәм аз гына таныш булган кешеләр фикере.  
Михаил Борисов Тукай районы Мәләкәс авылында туган. Тимерче улы һәм урманчы оныгы, ул балачактан ук һәр хезмәтнең кадерен белергә һәм табигый матурлыкны сакларга өйрәнгән. Чәчәкләр аның өчен матурлык, чисталык һәм сәламәтлек символы булган. Михаил бакчачы булырга хыялланган. Түбән Кама мәктәбен, аннары Алабуга педагогия институтын тәмамлаганнан соң, аңа тормыш чәчәкләрен - балалар үстерү – укыту эше йөкләнә, ә алары тагын да күбрәк игътибар, мәхәббәт һәм кайгыртучанлык таләп итә.
Хатыны Вера Ильинична (ул да педагог) белән бергә юллама буенча алар Ленино авылына киләләр, анда аны мәктәп директоры урынбасары итеп билгелиләр. Ике елдан соң ул аның директоры була.  Бу эштә Михаил Александрович укучылар, аларның әти-әниләре һәм педагогларының гына түгел, ә бәлки авыл халкының да ихтирамын казана. Аны Чистай район советы депутаты итеп сайлыйлар, аннары Ленино авыл советы рәисе итеп билгелиләр. Авылның барлык кешеләре турында кайгырту бурычын үтәп, ул балалар бакчасында һәм мәктәптә балаларның иминлегенә, яшьләргә зур игътибар бирә.
Яңа Чишмә районы оешкан чорда партия райкомы әгъзасы Михаил Борисовны авыл хуҗалыгы предприятиеләре җитәкчеләрен әзерләү курсларына җибәрәләр, аның ризалыгын берәү дә сорамый: боерык бирелгән – үтә! Шуңа да карамастан,курсларны тәмамлаганнан соң, Борисов кызыл диплом ала - бу инде аның канында: әгәр эшлисең икән, фәкать, «биш»кә эшләргә.
1984 елда аны Калинин исемендәге колхозга рәис итеп билгелиләр. Гаиләләре белән (хатыны, өч баласы, хатынының әнисе һәм карт әбиләре) Әдәмсә авылына күчеп киләләр.
Яңа вазыйфада Михаил Борисов авыл хуҗалыгы объектлары төзелеше белән бергә, Әдәмсәдә 260 укучыга исәпләнгән яңа мәктәп төзи.  Бу Татарстанның ике иң яхшы мәктәбенең берсе була. Иң авыр вакытларда (90нчы еллар башы) ул 250 урынга исәпләнгән тамашачылар залы белән авыл мәдәният йорты төзи. Коттеджларга күчеп килгән кешеләр яшәгән җимерелгән йортлар урынында хоккей тартмасы белән спорт мәйданчыгы төзи, чишмәләрне төзекләндерә, буа төзи, буаны авыл халкы «Миша күле» дип йөртә. Шулай итеп, Әдәмсә авылы Борисов өчен икенче кече ватанга әверелә.
Колхозларны бетергәч, Михаил Александрович «күктән йолдызлар эләктерергә» тырышмый, үзе төзегән мәктәптә гади укытучы булып эшли башлый. 2005 елда аны мәктәп директоры итеп билгелиләр, ул аннан 65 яшендә лаеклы ялга чыга.  Кемдер Борисовның башкалар файдасына актив эшчәнлеге шуның белән тәмамланган дип уйласа, ялгыша. Аның озак еллар хыялланган - җимерелгән Казан Изге Ана иконасы гыйбадәтханәсен торгызу белән шөгыльләнү өчен вакыты барлыкка килгән.
Бу изге идеяне Әдәмсә авылы халкы һәм православие динендәгеләр дә, мөселманнар да хуплый. Чиркәүне торгызуга һәркем үз өлешен кертә: территорияне чистарталар, җыештыралар. Кыскасы, бик зур эш башкарыла һәм аны Михаил Борисов оештыра.
2019 елның 4 ноябрендә Әдәмсә чиркәвендә Казан Изге Ана иконасы хөрмәтенә бәйрәм гыйбадәте оештырыла, аны Архангел чиркәве башлыгы Георгий атакай һәм Мәскәүдәге чиркәүләрнең берсенең башлыгы Дорофей атакай (ул шулай ук Әдәмсәнеке, Михаил Борисовның элеккеге укучысы Виктор Вичканов, гыйбадәтханәне торгызуда әйтеп бетергесез ярдәм күрсәткән) үткәрә.
Бүген юбиляр үзен бәхетле кеше дип саный: үзе хыялланган нәрсәнең күбесе Аллаһы Тәгаләнең хәер-фатихасы һәм кешеләр ярдәме белән тормышка аша. Аның янәшәсендә хатыны Вера, өч улы, дүрт оныгы, бер оныкчыгы, һәрвакыт элемтәдә торучы дуслары, авылдашлары бар. Ә алда Михаил Александровичның Әдәмсәдә тормышка ашырырга җыенган яңа идеяләре бар әле.
Лариса ФЕДОРОВА