Күңеле изгелектә

Аны гомер бәйрәме белән котларга район һәм авыл җирлеге җитәкчелеге килгән иде. Миңсылу Мөбарәкша кызы-җирле үзидарә органнары ветераны. 35 ел хезмәт эшчәнлегеннән ул 20 елдан артык авыл Советында хисапчы, аннан соң бухгалтер булып эшли. Без килгәч, аның кызы Минзифа, улы Гаяз һәм аның хатыны Фирдәвес юбилейга һәм күп санлы кунакларны каршы алырга әзерләнделәр. Балалары, оныклары, оныкчыклары, авыл һәм шәһәрләрдә яшәүче туганнарыннан тыш, Миңсылу Мөбарәкша кызы авыл советы буенча элеккеге хезмәттәшләрен аерым җыярга тели.
– Бик аз калды инде, әмма минем кебекләр бераз бар әле, - ди ул. - Үзебезнең кызлар белән утырып, ничек дус яшәвебезне һәм эшләвебезне искә төшерербез.
Ярый әле кызы, Минзифа белән яши торган иркен йорт күп кунакларны сыйдыра ала. Өйне Бөек Ватан сугышында катнашкан, балта остасы, столяр, шофер, тимерче, механизатор һәм авылда ихтирамга лаек булган мәрхүм ире Әмир төзегән. Аны Миңсылу әби 1949 елда, туган авылы Каргалы почтасында эшләгәндә Шахмайда үзенең хезмәттәшен декрет ялында алыштырган вакытта очрата.
Кияүгә чыга, колхозга эшкә урнаша. Ул вакытка 10 сыйныфны тәмамлап, педучилищеда укып, почтада эшли торган була, әмма ул авыр хезмәттән курыкмый: «чабаталы балачак» чыныктырды, ди. Беренче чын аяк киемен-чесанкаларны 7 сыйныфта сатып алдык, дип искә төшерде. Шахмай авылында фермада эшли, төрле эшләрдә була, ә 60 нчы еллар башында авыл Советына күчә. Җаваплы эштә булуы тәэсир итми калмагандыр, зыялы һәм акыллы Миңсылу Мөбарәкша кызының әле дә хәтере яхшы, колагы ишетә, күзе күрә. Ә рус телен яхшы белүе Каргалыга якын гына Михайловка рус авылы булуын аңлатты.
Ике ул һәм бер кыз тәрбияләп үстерәләр, һөнәр алалар, гаилә коралар. Кызганычка каршы, 20 ел элек олы улы Гаяр авырып китә һәм вакытыннан алда вафат була. Аның турында сөйләгәндә, Миңсылу әбинең тавышы кылтырап куйды. Күп еллар Гаяр гаиләсе әти-әнисе белән яши, Миңсылу әби оныкларын бакчага йөртә... Аның олы килене элеккечә Шахмайда яши, улы Гаяз хатыны белән – Ижауда. Миңсылу әбинең барлыгы алты оныгы бар, алар аңа 9 оныкчык бүләк иткән.
Миңсылу әби кызы белән үз йортына җәен генә кайта, кыш көне ул Минзифа белән Чистайда кызының шәһәрдәге фатирында яши. Кызы пенсиядә, гомере буе бер урында – Чистай дәүләт банкында эшләгән. Шахмайдагы йортлары зур, биек түшәмле, бизәкләү, мебель, көнкүреш техникасы, пластик тәрәзәләр заманча. Өйдә дә, ишегалдында да ир-егетләр кулы сизелә. Боларны оныгы, Минзифаның улы башкара.
Әбигә күңелсез булмасын өчен җәй көне бройлер сатып алалар. Кышкылыкка помидорлар япкан арада Гаязның хатыны Фирдәвес болай дип сөйләде:
- Менә минем әнием юк, ә ул үз әнием кебек якын. Ике килененә дә ачык йөзле, игелекле, изге күңелле. Бик грамоталы, культуралы. Ул бик тә акыллы кеше. Бөтен тормыш тәҗрибәсен безгә тапшыра. Бал кортларын бабай белән бергә карадылар. Бабай үлгәч, умартаны үз өстенә алды. Ә бу бит бик авыр эш. Әти-әниләр мал-туарны күп тотты. Безгә кунакка килгәндә дә бидоннар белән эремчек, бал, килограммлап өй сырын алып килделәр. Менә дигән вафли, печенье пешерә иде, кибеттән сатып алмады! Оекбашларны да безгә әле дә бәйли. Бик эшчән. Бабай да, ул да туганнарына, мөмкин булганча, һәрчак ярдәм иттеләр, өч туган, дүрт туган балаларга гына түгел, авыр тормышта калган һәркемгә дә ярдәм кулы суздылар.
Җитешлекләре бар икән, димәк, башкалар белән уртаклашырга кирәк, дия иделәр. Менә шундый кешеләр! Мин бу гаиләгә эләгүемә бик шат. Ул үзе физик яктан актив булырга тырыша. Күптән түгел генә бәрәңге казыдык, ә ул җыйды. Миңсылу әби елмаеп кына киленен төзәтә: «мин күбрәк сортировкада утырдым», ди. - Җәен Минзифа белән, кишер, помидор, суган, кыяр үстерәләр, - дип дәвам итте Фирдәвес. - Ишегалдында күпме кабак үстергәннәрен күрдегезме - тау кадәр бит! 50 данә бройлер (сезонга) алалар. Әби аларны көнгә 7 тапкыр ашата: үләнне, кычытканны алар өчен җыя, ботка пешерә, алма турый. Өй эчендә, әлбәттә, Минзифа күбрәк мәшәкатьләнә, ә әни инде көченнән килгәнчә булыша. Бик тату яшиләр. Көн саен алар белән сөйләшәбез: йә алар безгә шалтырата, йә без аларга.
Миңсылу әби таяк белән йөрсә дә, тез буыннары авыртып, кан басымы борчыса да эшсез тора алмый. Табиб язып биргән даруны эчә, сылый, тик шул ук вакытта шаяртып та ала: - миңа хастаханәгә барып, авыруга зарланырга да уңайсыз. Болай да күп гомер иттем инде. Шулкадәр гомер биргән өчен Ходайга рәхмәт.
Миңсылу әби барысына да бары яхшылык кына тели. Кешеләрдән көнләшү хисе аның күңелендә дә юк, диләр балалары.  Туганнарына ярдәм итәргә тырыша, аларның барысы да яхшы булса, ул бик канәгать.
Ольга ИВАНОВА