Зиратларда тәртип булырга тиеш
Сишәмбе көнне район башлыгы урынбасары Наилә Закирова авыл җирлекләре башлыклары белән киңәшмә үткәрде. Анда районның торак пунктларында зиратларның торышына кагылган мәсьәлә тикшерелде. Азат МУСИН Бу өлгергән мәсьәлә, аны тикшерү - зарури, чөнки күп кенә зиратларда гади тәртип юк, җирләү схемасы, зиратның торышы өчен җаваплы кешеләр юк, район үзәгендәге урыс зиратында...
Сишәмбе көнне район башлыгы урынбасары Наилә Закирова авыл җирлекләре башлыклары белән киңәшмә үткәрде. Анда районның торак пунктларында зиратларның торышына кагылган мәсьәлә тикшерелде.
Азат МУСИН
Бу өлгергән мәсьәлә, аны тикшерү - зарури, чөнки күп кенә зиратларда гади тәртип юк, җирләү схемасы, зиратның торышы өчен җаваплы кешеләр юк, район үзәгендәге урыс зиратында әле күптән түгел күмелгән мәетләрнең каберләре өстенә мәет күмү очраклары да булгалаган.
- "Җирләү һәм күмү эшләре турында" федераль закон да бар, - дип билгеләп үтте Наилә Закирова, - авыл җирлекләре башкарма комитетлары, шул законга таянып, үзләрендә җирле зиратларны тоту тәртибен эшләргә тиешләр. Шулай ук һәр зиратның читендә җирләү өчен кирәк-яракны саклау өчен корылма да булдырырга кирәк, әлегә алар 2-3 авылда гына бар.
Зиратка керү юлында мәгълүматлар тактасы булырга тиеш (андагы текстны төзү киңәшмәдә катнашучы Петр атакайга һәм районның имам-мөхтәсибе Илгиз хәзрәт Әшрәповка йөкләнде).
Җирләү схемасын үтәү өчен һәр торак пунктта җаваплы кеше билгеләп куярга кирәк, алар зираттагы тәртипне күзәтергә һәм кем кая тели, шунда җирләү очракларын булдырмаска тиешләр, кыскасы, бар җирдә дә төгәл тәртип булырга тиеш. Руханилар һәм мәчетләрдәге имам-хатыйблар әлеге мәсьәләдә авыл җирлекләре башлыкларының ярдәмчеләре булырга һәм барлык дини йолаларның, гореф-гадәтләрнең һәм ритуалларның үтәлешен күзәтергә тиешләр.
Соңыннан Наилә Закирова авыл җирлекләре башлыклары белән һәр зиратта нәрсә эшләргә кирәклеге һәм финанслау мәсьәләсе уңаеннан фикер алышты.
Яз җитү белән барлык зиратларда, аларны җыештыру һәм төзекләндерү максатыннан, өмәләр оештырылырга тиеш.
Следите за самым важным и интересным в Telegram-каналеТатмедиа
Подписывайтесь на наш Telegram-канал "Шешминская новь"
Нет комментариев