Муниципаль хәбәрләр
Республика программалары гамәлдә
Быел да республикабызда мөһим социаль объектлар, торак, юллар, авыл хуҗалыгы объектлары төзү, капиталь ремонтлау һәм реконструкцияләүне күздә тоткан 20дән артык программа эшләячәк.
Бу программалар безнең районда да гамәлдә, районда шушы максатларда үзләштереләсе капиталь салымнар 500 млн. сум чамасы тәшкил итәчәк. Моңа "Алексеевскдорстрой" ААҖ башкарасы республика әһәмиятендәге юлларны ремонтлау һәм төзек тоту да керә.
Районда төрле программалар буенча төзү һәм капиталь ремонт эшләре нинди күләмдә алып барылачак - район башкарма комитеты җитәкчесе Ринат Фәсаховка без шушы сорауларны бирдек.
- Ринат Рифгатович, районда нинди объектлар һәм нинди күләмдә төзеләсе хәзер билгеледер инде?
- Әйе, һәр программа буенча диярлек финанслау күләме билгеле, барлык подрядчылар да инде мәгълүм.
- Программаларда мөһим социаль объектлар төзү һәм капиталь ремонт ясауга өстенлек бирелә. Безнең районда нинди объектлар төзеләчәк һәм кайсылары ремонтланачак соң?
- Төзелештән башлыйк. Тубылгы Тауда 100 урынга исәпләнгән күп функцияле үзәк төзеләчәк, бу максатка 13 млн. сум чамасы акча бирү күздә тотыла.
Модульле ФАПлар төзү дәвам иттереләчәк. Быел Черемухово Бистәсендә медпункт төзеләчәк. Смета бәясе - 2,7 млн. сум.
Инде берничә ел рәттән район авылларында универсаль спорт мәйданчыклары төзелә. 2017 елда алар Петропавел Бистәсендә һәм Акбүредә пәйда булачак, ә Яңа Чишмәдә ясалма түбәле, ике киенү-чишенү бүлмәсе һәм 100 урынга исәпләнгән трибунасы булган хоккей тартмасы төзеләчәк (бәясе 8 млн. сумга якын).
Шахмай һәм Әдәмсә балалар бакчалары, Картлар йортындагы мунча - керләр юу комплексы, Екатерина һәм Зирекле авыл җирлекләре башкарма комитетлары биналары капиталь ремонтланачак, шулай ук РҮХ-дә җылыту системасы алыштырылачак. Яңа Чишмә урта мәктәбендә һәм Шахмай АМЙ-да газ мичләрен алыштыру планлаштырыла.
- Соңгы елларда республика программалары авыл хуҗалыгы объектларын да үз эченә ала. Бу планда бездә ничек?
- Бик дөрес, сенаж траншеялары төзүгә, сыерлар абзарларын капиталь ремонтлауга республикадан ярдәм бар. Быелгысы елда ике сенаж чокыры төзеләчәк һәм алты сыер абзары капиталь ремонтланачак (өчесе 100 һәм өчесе 200 башка). Бюджеттан биреләсе субсидия - 9 млн. сум, бәяләрнең калган өлеше фермаларның үз хисабыннан. Шулай ук район үзәгендә ветеринария берләшмәсе бинасына да капиталь ремонт ясау күздә тотыла.
- Районда эшләр нинди торак төзелеше программалары буенча алып барылачак?
- Бу бүлек берничә программаны үз эченә ала. Күп фатирлы йортларны капиталь ремонтлауга Заливная урамындагы № 8 һәм 20 йортлар, Ленин урамындагы № 35 һәм 46 йортлар һәм Буреев урамындагы № 5 йортлар кертелде. Монда, нигездә, йортның фасады һәм электр белән тәэмин итү системаларын ремонтлау планлаштырыла. Әлеге максатларга 4,6 млн. сум нан артык акча каралган. Ике йортта әлеге эшләр "Татэнергосбыт" АҖ акчасы хисабына башкарылган инде. Ятим балаларга йортлар төзү һәм яңа "Көнбатыш" микрорайонында индивидуаль торак төзелеше дәвам итәчәк (монда күп кенә яшь гаиләләр республика субсидияләре алачак).
- Коммуналь хуҗалык өлкәсендә нинди эшләр алып барылачак?
- "Чиста су" программасы буенча Әдәмсәдә, Сөлчәбашта һәм Яңа Чишмәдә суүткәргеч челтәрләргә ремонт һәм реконструкция ясау эшләре дәвам иттереләчәк (9 млн. сум тирәсе акча бүлеп бирү каралган). Шулай ук район үзәгендә КНС ка капиталь ремонт ясау эше дә планлаштырылган (гомуми күләм 8 млн. сумлык). Красный Октябрьдә су әзерләү җайланмасын урнаштырып, 3,8 млн. сумлык суүткәргеч төзеләчәк.
2014 елдан Татарстанда авылларда урам яктырткычларын торгызу буенча программа эшли. Ул агымдагы елда да дәвам итәчәк - районның 11 торак пунктында 2,5 млн. сум акча үзләштерелергә тиеш.
(Ахыры 2 биттә)
(Ахыры. Башы 1 биттә)
- 2015 елда район үзәгендә бик матур мәдәният һәм ял паркы пәйда булды, ә 2016 елда анда фонтан куелды. Агымдагы елда анда тагын ни дә булса төзеләчәкме?
- Әйе, брусчатка салу, паркны кече архитектура формалары белән җиһазлау, яктырту һәм яшелләндерү эшләре дәвам иттереләчәк. Әлеге максатларга 8,6 млн. сум акча бүлеп бирү планлаштырылган. Бу эштә безгә "ТатРИТЭКнефть" актив иганә ярдәме күрсәтә. Хәзерге вакытта алар көче белән паркны киңәйтү өчен мәйданчык әзерләнә.
- Иң күп акча, мөгаен, юл төзелешенә китәчәктер?
- Әлбәттә, әлеге өлкә бик күп көч куюны таләп итә һәм иң чыгымлысы да, капиталь салым күләме 300 млн. сумнан артык тәшкил итә (республика һәм федераль әһәмияткә ия юлларны төзек тотуны да кертеп).
Район эчендә Яңа Чишмәдә һәм торак пунктлардагы юл-урам челтәрләренә ремонт эшләре күздә тотыла: Красный Октябрьдә (1 км), Бакташта (685 м), Чаллы Башында һәм Шахмайда юлга (1,36 км) комлы вак таш түшәү, шулай ук район үзәгендә тротуарларны төзәтү һәм үтеп йөрү өлешен әйбәт хәлдә тотуга бәйле башка юл эшләре башкарасы бар.
Барлык программалар да халкыбыз көнкүрешен яхшырту, яшәү өчен уңай шартлар тудыруга юнәлдерелгән.
- Эчтәлекле әңгәмәгез өчен рәхмәт сезгә.
Газета укучыларыбызда билгеләнгән программалар буенча сораулар һәм тәкъдимнәр туса, газетабыз сайтына (novoshishminsk.ru) яки редакциягә язып җибәрергә мөмкин.
Следите за самым важным и интересным в Telegram-каналеТатмедиа
Подписывайтесь на наш Telegram-канал "Шешминская новь"
Нет комментариев