Сәламәт булырга теләсәң…
22 сентябрьдә Яңа Чишмә районы халкы бердәм булып "Татарстан кроссы-2013" стартына чыкты. Төрле дистанцияләрдәге узышларда биш йөздән артык кеше катнашты.
Алар арасында үзләренең физкультура укытучылары һәм мәктәп директорлары җитәкчелегендә мәктәп укучылары, учреждение һәм оешмаларда, авыл хуҗалыгы оешмаларында эшләүчеләр, авыл җирлекләре командалары, VIР-катнашучылар һәм әлеге чарада катнашырга теләүчеләр бар иде. "Олимп" УСЗ тирәсендә халык байтак иде, монда, әлбәттә, катнашучылар һәм җанатарлар җыелган.
- Мәктәптә мин спортчы идем, шундый чараларда катнашырга яраттым, ә бүген Саклык банкы өчен йөгерәм, - дип сөйләде оешма хезмәткәре Анна Некрасова.
Ленино авылыннан килгән укучылар командасы кеше саны буенча иң зурысы иде:
- Кросста без бик теләп катнашабыз. Һәр көнне йөгерер идек әле, бигрәк тә уку көннәрендә.
Яшьләр эшләре буенча бүлек начальнигы Ольга Лаврентьеваның кыскача гына котлау сүзләреннән соң БЯСМ хөкемдарлары-тренерлар ярышларның программасы белән таныштырдылар.
500 метрлы дистанциядә беренчеләрдән булып кечкенә сыйныф укучылары ярышты. Яшь төркеме буенча чираттагы йөгерүләрдә югары сыйныфларда укучы егетләр һәм кызлар алда булды. Укытучылары һәм сыйныфташлары исә финишка якынлашучыларга көч биреп тордылар. Шунысы сөендерә, һәр дистанциядә халык күп иде. Кемдер үз көчен беренче тапкыр сынап карады, кайсыдыр мондый ярышларда даими катнаша, ә 1,5 километр арадагы узышта җиңүче Илфат Садыйков (Зирекледән) инде ныгып өлгергән спортчы. Район Сабан туйларында чокырлы-чакырлы урыннар буйлап йөгерүдә берничә тапкыр җиңү яулаган егет хәзер КХТИ-ның II курс студенты һәм спорт белән профессиональ төстә шөгыльләнә. Яңа Чишмә РҮХтән иң спортчы вәкил - акушерка Лира Попкова 1000 метр арада җиңү яулады. Ә аның хезмәттәше Ирина Бочарова инде берничә ел йөгергәне булмаган, тик шулай да үз коллективына ярдәме тиде.
1000 метрга VIР-узышлар бик тә үзенчәлекле булды. Менә кайда ул район оешмалары җитәкчеләре, авыл җирлекләре башлыклары үзләрендә эшләүчеләргә сәламәт яшәү рәвешенә чын күңелдән бирелгәнлек үрнәкләрен күрсәттеләр. Йөгерү һәм сәламәтлек бәйрәме кызганнан-кыза барды, көрәшкә тагы да олыраклар кушылды. 45 яшьтән өлкәнрәк ир-атлар арасындагы ярышта физкультура укытучылары менә дигән физик хәзерлекләрен күрсәттеләр. Ә менә 3 яшьтән алып 6 яшькәчә булган кечкенәләр узышы иң кызыклысы булды, алар 30 метр арада йөгереп килделәр, финишта исә аларны татлы приз көтте.
Йөгерүләр (узышулар) төгәлләнгәч, җиңүчеләрне бүләкләү тантанасы булды, 1, 2, 3 урыннарны яулаучыларга дипломнар һәм медальләр тапшырылды.
- Бүген минем нәтиҗә ярыйсы - җиденче. Мин йөгерергә яратам, ә мондый кросста дүртенче тапкыр катнашам. Киләсе елда да киләм әле, - диде Чуаш Чабаксары мәктәбе укучысы Николай Петров.
Чыннан да, җиңү түгел, ә катнашу мөһим, чөнки йөгерүчеләрнең барысы да ул көнне вакытны файдалы итеп үткәрде.
Вакыйгалар турында үз фикерегезне, башка фоторәсемнәрне сез газетабызның novoshishminsk.ru сайтында калдыра һәм карый аласыз.
Ольга ИВАНОВА
Следите за самым важным и интересным в Telegram-каналеТатмедиа
Подписывайтесь на наш Telegram-канал "Шешминская новь"
Нет комментариев