«Спорт – ул минем тормышым»
Яңа Чишмәдәге БЯСМ тренеры Валерий Кузнецовны һич икеләнүсез универсаль тренер дип атарга мөмкин. Ул спортның төрле төрләре - футбол, волейбол, баскетбол, хоккей һ.б. буенча көчле команда хәзерли ала. Белемен һәм хәзерлеген ул Әлмәттәге физик культура техникумында чарлаган, тәҗрибәсе дә җитәрлек - 17 ел райондагы балалар спорт оешмасында эшли.
Нәкъ менә 17 ел ул булачак спортчылар, район һәм республика чемпионнары, көчле, физик яктан чыдам егетләр тәрбияли, нәкъ менә аның ярдәме белән бу яшьләр спорт белән дуслашкан. Ул - Яңа Чишмә балалар-яшүсмерләр спорт мәктәбе оешуның башында торган кеше дияргә дә мөмкин. Техникум тәмамлап кайткач, ул өч ел яшь туристлар станциясен җитәкли, аннан балалар-яшүсмерләр физик хәзерлек клубын (ДЮКФП) әйди, 2006 елда ул БЯСМ итеп үзгәртелә. Валерий Викторович берүк вакытта директор вазыйфасын да уңышлы башкара, актив тренер булып та тора. 2011 елдан БЯСМ директоры урынбасары буларак ул җаны-тәне белән укыту-тәрбия эшенә чума. Мәктәптә чакта ук ул һөнәр сайлауда икеләнми, физкультура белән спортны яратканга үзе укыган Яңа Чишмә гимназиясендә физкультура укытучысы булып эшли башлый, ТИН дәресләре дә укыта. Хәзер Валерий Викторович баскетбол буенча укучылар командасын өйрәтә. Күптән түгел ирешкән уңышлары - җиңүләре - укучылар командалары арасындагы республика Спартакиадасында икенче урын. Аның җитәкчелегендә шулай ук 17 һәм аннан да өлкәнрәк яшьтәге яшүсмерләрдән торган 5 волейбол командасы шөгыльләнә, алар Яңа Чишмә районы авыл җирлекләре арасында берничә мәртәбә чемпион булганнар.
- Спорт - ул минем тормышым, аңлы рәвештә сайланган юл. Эштә балалар белән аралашу бик тә ошый, алар белән бергә атларга тырышам. Алар белән занятиеләр үткәрү аркасында үземне дә тонуста тотам.
Ул читтән торып Казан икътисад, идарә һәм хокук институтында югары белем алган. Балалар спорт ярышларында (велокросс, чаңгы һ.б.) актив катнашучы 14 яшьлек кызы Ульянада да спортка карата мәхәббәт тәрбияләгән. Хатыны Ольга да ире белән кызларының мавыгуын хуплый.
Яңа уку елы башланырга да күп калмады, тиздән БЯСМ-гә йөрүчеләр спорт белән шөгыльләнергә киләчәк, тренерлар һәм бүгенге героебыз ярдәмендә аларны алда яңа спорт казанышлары көтә.
Ольга ИВАНОВА
Следите за самым важным и интересным в Telegram-каналеТатмедиа
Подписывайтесь на наш Telegram-канал "Шешминская новь"
Нет комментариев