Борчак уңган
"Зубов В.С." КФХ-да быел 300 га мәйданда борчак чәчкәннәр һәм ул бик уңган. Борчак гектарына 25 центнер уңыш биргән. Евгений СТАРОВ
Владимир Зубов "Флагман-10" сортлы борчакны өч ел элек Рязань өлкәсеннән алып кайткан булган. Бу сорт борчакны турыдан-туры урып-җыярга да мөмкин, ул җиргә ятмый. Суктыруның беренче көннәрендә уңыш гектарына 33 центнер да чыккан. Иртә срокта чәчелгән солы да уңган. Язын, 18 апрельдә без хәзер урдырылган басуда булган идек. Солының уңышы гектарына 40 центнер чамасы чыгачак.
60 гектар солыны комбайнчы Алексей Захаров (рәсемдә уңда) ЖЗБ-4,2 ургычлы СК-5 комбайны белән урдырган. Хәзер ул борчак урдыруны төгәлли, тиздән арпага күчәчәк, бу культура исә 492 гектар мәйданда чәчелгән һәм бик матур булып үскән. Комбайнчы Михаил Ворожеин борчак суктыру белән мәшгуль, 50 тоннага якын суктырган да инде. Комбайннар суктырган барлык ашлыкны (суктыруда тагын фермер Фәрхат Вәлиевның ике комбайны эшли) КамАЗ шоферы Александр Степанов (рәсемдә сулда) ташыган. Фермер Зубовка игеннәрне ектыруда "Кулон" агрофирмасыннан "Магдон" ярдәм итә. Хуҗалыкта уракчыларны ашату оештырылган. Николай Зубов ГАЗель автомашинасында төшке ашны кырга алып чыга, таратып йөри. Техника ватыла-җимерелә калса, эретеп ябыштыручы Виталий Федоров аны басуда ук төзәтергә әзер.
Дүшәмбе көнне хуҗалыкта яшел азыкка 60 гектар рапс чәчтеләр. Чәчүдә тракторчы Николай Имаров эшләде, орлыкларны Александр Степанов ташып торды.
Фермер хуҗалыгында кышлатуга азык хәзерләү турында да кайгырталар. 120 гектар берьеллык үлән басуыннан 600 тонна печән хәзерләгәннәр, 150 гектар мәйдан биләүче кукуруз да күкрәп үскән, аннан бик әйбәт силос чыгачак.
Урып-җыю эшләре колач ала бара, "Зубов В.С." КФХ-да аңа уңышлы керешкәннәр.
Следите за самым важным и интересным в Telegram-каналеТатмедиа
Подписывайтесь на наш Telegram-канал "Шешминская новь"
Нет комментариев