Чәчү темплары арта

Хәзер һәр җирдә туңга сөрелгән җирләрдә дә, уҗым һәм күпьеллык үлән чәчүлекләрендә дым каплатып калырга, шулай ук аларны тукландырырга кирәк.

-24 апрельгә туңга сөрелгән җирләрдә дым каплату эшләре 10 мең гектардан артык мәйданда башкарылган (барлык мәйданның 18%ы),- диде район авыл хуҗалыгы идарәсе начальнигы Сергей Баранов. -Күпчелек хуҗалыкларда агрегатлар көйле эшли.

Алар арасында Мария Козлова фермер хуҗалыгы да бар, монда көн саен дым каплатуда кимендә 7-8 агрегат эшли.

-Безгә 2200 гектардан артык мәйданда сабан культуралары чәчәсе бар,- дип сөйли хуҗалык идарәчесе Александр Маратканов. - Сабан бодае 1000 гектардан артык, арпа - 800 га тирәсе, солы 300 гектардан артык мәйданны билиячәк. Хәзер шулай ук оператив төстә күпьеллык үләннәрне һәм көзге культураларны тукландыру һәм тырмалау эшләрен алып барабыз. Ягулык-майлау материаллары һәм ашламалар белән проблема юк. Тырмалау агрегатлары иртәнге сәгать 6 дан да соңламый кырда булалар, без килгәнче тәҗрибәле механизатор Михаил Барсуков эшли, ерак кырда инде берничә әйләнеш ясаган иде.

-Бу хуҗалыкта алтынчы ел эшлим, тракторымның да (ДТ-75) сынатканы юк, һәр көнне күбрәк мәйданда дым каплатып калырга тырышам, - диде ул эшләгән шәпкә һәм тагын трактор рычагына ябышты.

Аның механизаторлык стажына да 15 елдан артык (моңарчы "Сельхозхимия"дә куәтле К-701 тракторында эшләгән, техниканы биш бармагы кебек белә).

Барлык агрегатлар шулай көйле эшләгәндә һәм көннәр матур торганда "Козлова М.И." игенчеләре язгы кыр эшләрен 10-12 көндә төгәлләргә җыеналар.

Азат МУСИН