Киләчәккә – өмет белән
30 ел элек, нәкъ шул көнне - 1983 елның 26 апрелендә РСФСР Югары Советы Президиумының Яңа Чишмә районын оештыру турындагы Указы чыкты. Бүген без районның юбилее көнендә Яңа Чишмә муниципаль район башлыгы, район Советы рәисе, ТР-ның атказанган авыл хуҗалыгы хезмәткәре Вячеслав Михайлович Козлов белән әңгәмә корабыз.
В.М. Козлов Яңа Чишмәдә туып үскән - шушы авыл кешесе, хезмәт эшчәнлеген ул ХХ партсъезд исемендәге колхозда бригадир ярдәмчесе булып башлый, аннан "Закамский" совхозы директоры, район башлыгы урынбасары булып эшли. 1998 елдан 2000 елга чаклы районны, соңрак 10 ел дәвамында Чистай районын һәм шәһәрен, 2010 елның апреленнән бирле кабат үзенең туган районын - Яңа Чишмәне җитәкли.
- Вячеслав Михайлович, 30 ел элек булган хәлләргә - 1983 елга кире кайтыйк әле. Сез ул чагында республикада эре хуҗалык саналган ХХ партсъезд исемендәге колхоз рәисенең урынбасары булып эшли идегез. - Яңа Чишмә районын оештыру турындагы карарны ничек кабул иттегез?
- Яңа Чишмә районын оештыру турындагы хәбәрне без уңай кабул иттек, бу бик акыллы һәм дөрес карар иде. Бер мисал гына китерәм. 1959 елда районда 28 меңнән артыграк кеше яшәгән булса, 1983 елга нибары 16 мең кеше торып калды, халыкның яртысын диярлек югалттык, күп кенә торак пунктлар юкка чыкты. 1962 елда Хрущевның районнарны эреләндерү (берләштерү) сәясәте дөрес булмады, ул чагында безне Чистай районына куштылар, район үзәгендәге барлык учреждениеләр һәм оешмалар ябылды, күпләр Яңа Чишмәне бөтенләйгә калдырып китте. Шушы еллар эчендә (1962-1983) Яңа Чишмә районы Чистай районының еракта урнашкан онытылган бер төбәгенә әверелде, биредә бер нәрсә - ни юллар, ни объектлар төзелмәде. Шулай итеп, бик дөрес карар кабул ителде, без аны бөлгенлеккә төшүдән, республика картасыннан юкка чыгудан коткару (саклап калу) дип кабул иттек.
- Шушы еллар эчендә Сезгә районда беренче 4 кеше (А.Н. Казаков, Г.Х. Хафизов, В.П. Макаров, Н.М. Владимиров) җитәкләгән чорда эшләргә туры килде. Кайсы белән аңлашып, җиңелрәк эшләдегез, яки киресенчә?
- Беренчедән, шуны әйтер идем, районны торгызырга алынган, эшне башлап җибәрүчеләргә: Казаков белән Хафизовка эшнең авыры төште. Буш җирдә предприятиеләр төзеп, оештырырга, барлык структураларны булдырырга туры килде. Шулай да бер ягы уңай булды, республика җитәкчелеге районда һәрдаим планеркалар үткәреп торды, куәтле төзелеш һәм нефть чыгару берләшмәләре эшкә җәлеп ителде, һәммәсен КПСС-ның өлкә комитеты катгый контрольдә тотты.
90 нчы елларда районны җитәкләүчеләргә җиңелрәк булды, ул инде оешкан, максатка юнәлешле эш алып барыла иде, тик акча булмау, үзгәртеп кору еллары үз кыенлыкларын тудырды. Республикада максатчан программалар (юллар, тузган торак һ.б.) эшли башлагач кына хәлләр бераз җиңеләйде.
Икенчедән, сезнең сорауга җавап биреп шуны әйтергә телим, районның һәр җитәкчесе проблемаларны үзенчә күрде, үзенчә аңлады һәм хәл итте. Казаков белән мин күп эшләмәдем, ә менә Хафизов вакытында аның хәер-фатихасы белән "Закамский" совхозын җитәкләдем. Ул үзенең компетентлы, кырыс булса да гадел һәм таләпчән булуы белән хәтердә калды. Ул һәр эшнең нечкәлекләренә төшенергә тырышты, районда һәр җиргә үзе йөрде. Тагын шунысы истә, берәр җирдә теге яки бу проблема туа калса, бөтен төр хезмәтләр шунда тупланып, инде ул проблемалар район масштабында ук хәл ителеп, тулысынча бетерелә иде.
В.П. Макаров зур хәрефләр белән язарлык төзүче буларак истә калды. Ул намуслы, эшлекле җитәкче. Һәр объектны йөрәге, җаны-тәне аша уздырды. Мин инде ул чагында аның урынбасары идем, төзелеш индустриясендә көйләнгән элемтәләре аркасында район өчен күп эш эшләнде, шул исәптән торак пунктларга газ үткәрелде.
Н.М. Владимиров терлекчелеккә, шулай ук авылларыбызны төзекләндерүгә һәм ямьләндерүгә нык игътибар итте.
Район җитәкчеләре турында сөйләшәбез икән, 10 ел районны җитәкләгән А.С. Губкин турында да әйтми мөмкин түгел. Шәхсән үзем күрше районны җитәкләсәм дә, Яңа Чишмәдәге уңай үзгәрешләргә сөенеп яшәдем. 10 ел эчендә социаль-мәдәни-көнкүреш объектларын төзү һәм үзгәртеп кору, юлларга асфальт түшәү, кырларның һәм фермаларның продуктлылыгын арттыру буенча байтак эш эшләнде.
- Вячеслав Михайлович, менә өч ел инде Сез кабат үзебезнең районны җитәклисез, шушы еллар эчендә ниләр эшләнде һәм тагын ниләр эшлисе калды?
- Күп нәрсә эшләнде. Торак төзелеше, күпфатирлы йортларга, мәдәният учреждениеләренә, балалар бакчаларына, мәктәпләргә капиталь ремонт үткәрү буенча зур күләмле эш башкарылды.
Федераль һәм республика программалары ярдәмендә сугыш ветераннары һәм аларның тол калган хатыннары өчен торак төзү, суүткәргеч челтәрен ремонтлау һәм төзү, юлларга асфальт түшәү буенча эшләр дәвам иттерелә. Район үзәгендә гаҗәеп объектлар: "Олимп" УСЗ һәм "Жемчужина" йөзү бассейны калкып чыкты, бу эштә безгә республика җитәкчеләре һәм нефть компанияләре нык булышты.
Мине шунысы да сөендерә, халыкның тормыш хәле яхшыру белән беррәттән дин дә торгызыла - барлык татар авылларында мәчетләр эшләп тора, район үзәгендә, Архангел Бистәсендә чиркәү торгызылды, Петропавел Бистәсендә яңасы төзелде, башка торак пунктларда да гыйбадәт йортлары булачак.
Ирешелгәннәр белән генә тукталып калмыйча, безгә барлык тармакларда да җитештерүне арттырырга, бизнесны үстерергә, яңа эш урыннары булдырырга, икътисадның барлык тармакларында әйбәт хезмәт хакы алуга ирешергә һәм шуның белән районыбыз кешеләренең тормыш хәлен яхшыртырга кирәк.
Әңгәмәбезне йомгаклап, Вячеслав Михайлович 30 ел дәвамында районны торгызуга көчен һәм энергиясен кызганмаган һәр кешегә, районга бәяләп бетермәслек ярдәм күрсәткән республикабыз җитәкчеләренә, нефть компанияләренә рәхмәт белдерде һәм барлык яңачишмәлеләргә ныклы сәламәтлек, имин, мул тормыш теләде, булганның кадерен белеп, киләчәккә өмет белән карарга чакырды.
Әңгәмәне Азат
МУСИН алып барды
Следите за самым важным и интересным в Telegram-каналеТатмедиа
Подписывайтесь на наш Telegram-канал "Шешминская новь"
Нет комментариев