Үксезләр, әмма үги түгелЛӘР
Биш ятимнең язмышы бер сәгатьтә хәл ителә: мәрхәмәтле авыл кешеләре балаларга ятимнәр йортында адашырга ирек куймыйлар, опека һәм попечительлек буенча юридик белгечләр дә ярдәм итә.
Ринат белән Валентина Хәйруллиннар кыю кешеләр: яшь чакта ук өйләнешүгә романтика эзләп түгел, эшкә дип Камчаткага китәләр. Чит җирләрдә яшьләр бер-беренә тагы да якынаялар, бер-берсен ярты сүздән аңлыйлар, шулай килеп чыга ки, икесенең дә кабат туган якларына - Татарстанга кайтасылары килә. Эшче куллар кирәккән Түбән Кама шәһәрен сайлыйлар. Яңа Чишмә районы территориясендә шиналар заводыннан ул чакта "Шинник" ярдәмче хуҗалыгы оештырыла һәм Ринатка, техника һәм механика буенча универсаль белгеч буларак, тиешле урын тәкъдим итәләр. Хәйруллиннар киңәшләшеп, Екатериновка авылында "Шинник" төзегән яңа коттеджга күченәләр, аннан Валентинаның туган авылы - Черемуховога да ерак калмый, Ринат үзе Чистай кешесе. Үз хуҗалыкларын булдыралар, дуслары да ишәя. Үз эшләрен яратып башкаралар, завод аларга Түбән Кама шәһәреннән фатир биргәч тә, авылда калалар. Шушы карар күршедә ятим калган биш баланың язмышына да кагылмый калмый. Валентина тәрбиягә бала алу турында иренә сүз каткалап караса да (ире ризалыгын бирсә дә) бу эш гел кичектерелеп килә. Хәйруллиннарның иркен өйләрендә, бигрәк тә җәй көннәрендә, бала-чага тавышы тынып тормый: Валентина белән Ринатның туганнарыннан туган балалар, күрше балалары үзләрен иркен, җиңел һәм якланган итеп тоялар. Күршеләрендә бәхетсезлек килеп чыга: каты авырудан биш баласын калдырып әни кеше дөнья куя. «Ямашнефть»тә шофер булып эшләүче әтиләре Ринатның әйбәт танышы һәм хезмәттәше була. Хәйруллиннар ялгыз калган иргә балалар тәрбияләшергә булышалар, тик озак тормый, әти кеше дә үлеп китә. Әтиләрен җирләгән вакытта балалар Ринатка елышалар, күзләрендә "без хәзер ничек яшәрбез", "Ринат абый, безне үзегезгә алыгыз әле" дигән мәгънә чагыла. Ринат Зиннәт улы уйлап та тормый: "Алабыз", - ди. Ул хатынының каршы килмәсенә ышана. Шулай булып чыга да. Опека һәм попечительлек буенча белгеч Любовь Суворова яңа әти-әнигә барлык инстанцияләрне үтәргә ярдәм итеп, балаларны опекага бирүне рәсмиләштерә. Ул чакта инде Леша мөстәкыйль егет - аңа 16 яшь була, мәктәпне уңышлы тәмамлаган, шоферга укыган, хәзер Әстерхан өлкәсендә зенит гаскәрләрендә хезмәт итә. 4 ай хезмәт итү дәверендә өенә даими шалтыратып тора, Ринат абыйсы һәм Валя апасының сәламәтлекләрен белешеп тора, энеләре һәм сеңелләренең эшләре, уңышлары белән кызыксына. Андрей да бик җитди егет, ул да шофер таныклыгы алган, хәзер әтисе эшләгән "Ямашнефть" оешмасында эшли. 11 яшьлек Ксюша 6 яшьлек Кристинаны һәм 4 яшьлек Никитаны карарга булышкан һәм һәрвакыт: "Валя түти, Сез аларны артык иркәлисез", - дигән. - Шулай булмыйни, - ди Валентина Петровна, - алар беренче көннән үк безгә әни һәм әти дип дәшә башладылар, шушылар хакына үзең ияләшкән тормышны башкасына, ягъни балалар турында кайгыртып, мәшәкатьләр һәм борчулар тулы тормышка алмаштыру да кызганыч түгел.
Кызлар инде Петропавел Бистәсендәге мәктәптә укыйлар, аларга анда бик ошый (дус кызлары күп, зур мәктәп, яхшы укытучылар), Ксюша бик яхшы укый, Кристина да 4 һәм 5 билгеләре генә ала, ә Никитага авыл мәктәбендә дә яхшы, укуда да өлгерә, яхшы укый.
Әти-әниләре балаларының югары үрләр яулауларын таләп итмиләр, алар фәкать аларны ничек бар шулай яраталар, хөрмәт итәләр.
Балаларга акча кызганмыйлар, төрле бәйрәмнәрдә бергәләшеп районга баралар (1 нче биттәге рәсемдә алар ике ел элек үткән Сабан туенда). Соңгы араларда бергә төшкән фотолары табылмады, әмма башка рәсемнәре бик күп иде: кечкенәләр өчәү - Болгарда, Кристина Соль Илецкида төшкәне, шунысын да әйтеп үтик, көзге каникулда Никита Мәскәүгә җыена.
Хәйруллиннар зур ярдәмче хуҗалык тоталар: МЭТ, сарыклар, дуңгызлар асрыйлар, каз-үрдәк үстерәләр, хуҗаларга йортта эш җитәрлек, шуңа күрә Валентина инде бер ел эшләми, ә бер елдан ул пенсиягә чыга, ерак юлларга йөрүче Ринатка да пенсиягә чыгарга шул хәтле вакыт калган. Ни өчен ерак юлга йөрүче диярсез? Зур гаиләдә бар да җитеш булсын өчен тагы кайда күбрәк хезмәт хакы алып булсын соң? Алексей армиядән кайткан вакытка балаларга әти-әниләреннән калган йортка косметик ремонт ясарга кирәк булачак. Ә анда туй була калса, башкасы… Кечерәкләргә яхшы белем бирәсе бар. Ничек кенә булмасын, Ринат белән Валентина, байтак еллар үтсә дә, алар бер зур гаилә булып каласыларына өметләнәләр.
Лариса ФЕДОРОВА
Следите за самым важным и интересным в Telegram-каналеТатмедиа
Подписывайтесь на наш Telegram-канал "Шешминская новь"
Нет комментариев