Мәдәният йорты ачылды
Пәнҗешәмбе көнне районда эре торак пунктларның берсе булган Акбүре авылында "Авыл клубы" республика программасы буенча "Стройсервис" ЯАҖ көче белән торгызылган яңа Мәдәният йортын ачу тантанасы булып узды. Азат МУСИН - Акбүрелеләр өчен бу шатлыклы вакыйга, Мәдәният йорты авылны ямьләп тора, хәзер без буш вакытта бирегә килеп ял итә, концертлар, төрле...
Пәнҗешәмбе көнне районда эре торак пунктларның берсе булган Акбүре авылында "Авыл клубы" республика программасы буенча "Стройсервис" ЯАҖ көче белән торгызылган яңа Мәдәният йортын ачу тантанасы булып узды.
Азат МУСИН
- Акбүрелеләр өчен бу шатлыклы вакыйга, Мәдәният йорты авылны ямьләп тора, хәзер без буш вакытта бирегә килеп ял итә, концертлар, төрле чаралар оештыра алачакбыз, - диде ачу тантанасын алып баручы Рәшит Рәхимов (ул үзе дә озак еллар АМЙ директоры булып эшләде), ул шундый мәһабәт, матур бина төзеткән өчен республика һәм район җитәкчеләренә рәхмәт җиткерде.
Авыл җирлеге башлыгы Җәүдәт Җәләлетдинов "Авыл клубы" программасы буенча беренче булып яңа мәдәният учагын нәкъ менә Акбүредә төзү каралды, дип билгеләп үтте, район җитәкчеләренә, авыл өчен үтә дә мөһим объектны тиз арада төзеп файдалануга тапшырган төзүчеләргә рәхмәтләр әйтте, үз чиратында Мәдәният йорты бинасын әйбәт хәлдә тотарга, сакчыл карарга вәгъдә итте.
Район башлыгы Вячеслав Козлов төзүчеләргә объектны кыска срокта тапшырганнары өчен рәхмәт белдерде, акбүрелеләр үзләре дә АМЙ тирәсен төзекләндерү һәм яшелләндерүдә ярдәм күрсәттеләр, инде Акбүредән китсәләр дә, туган авылларына мәчет, буа, юллар һ.б. төзүдә ярдәм итеп торалар, аларга да зур рәхмәт, дип белдерде. Ул шулай ук "Стройсервис" ЯАҖ мастерлары Фәнис Әхмәтшинга, Мио Манукянга истәлекле бүләк, Җәүдәт Җәләлетдиновка уеннар оештыру өчен кирәкле товарлар сатып алуга (акчалата) сертификат тапшырды, мәдәният учагы беркайчан да буш тормасын, биредә төрле мәдәни чаралар узып торсын, дип теләде.
-Без Мәдәният йортын төзүдә һәрдаим район җитәкчеләренең һәм җирле халыкның ярдәмен тойдык, - диде үз чыгышында "Стройсервис" ЯАҖ генераль директоры Хәлим Билданов. АМЙ озак еллар хезмәт итсен, аңа сакчыл мөнәсәбәттә булыгыз, дигән теләкләр белән ул Мәдәният йорты директоры Гомәр Насыйровка символик ачкыч тапшырды. Аннан җыелган кунаклар хөрмәтенә районның үзешчән сәнгатьтә катнашучылар, Чаллы Башы авылыннан фольклор ансамбле чыгышлары тәкъдим ителде.
Рәсемдә: Хәлим Билданов (сулда) Гомәр Насыйровка символик ачкыч тапшыра.
Газетабызның novos-hishminsk.ru cайтында бу вакыйгага бәйле рәсемнәрне күбрәк карый һәм үз фикерләрегезне җиткерә аласыз.
Следите за самым важным и интересным в Telegram-каналеТатмедиа
Подписывайтесь на наш Telegram-канал "Шешминская новь"
Нет комментариев