Премьер-министр безнең районда
30 апрельдә ТР Премьер-министры Илдар Халиков белән ТР Премьер-министр урынбасары - ТР авыл хуҗалыгы һәм азык-төлек министры Марат Әхмәтов Яңа Чишмә муниципаль районында булдылар. Алар язгы кыр эшләренең барышы белән таныштылар. Евгений СТАРОВ ТР Хөкүмәте башлыгы һәм министр район башлыгы Вячеслав Козлов белән бергә вертолетта Яңа Чишмә районы кырларын карап...
30 апрельдә ТР Премьер-министры Илдар Халиков белән ТР Премьер-министр урынбасары - ТР авыл хуҗалыгы һәм азык-төлек министры Марат Әхмәтов Яңа Чишмә муниципаль районында булдылар. Алар язгы кыр эшләренең барышы белән таныштылар.
Евгений СТАРОВ
ТР Хөкүмәте башлыгы һәм министр район башлыгы Вячеслав Козлов белән бергә вертолетта Яңа Чишмә районы кырларын карап әйләнделәр. "Татарстан" агрофирмасының Әдәмсә бүлекчәсе кырында алар хуҗалыклар, район үзәге оешмалары җитәкчеләре, авыл җирлекләре һәм фермер хуҗалыклары башлыклары, шулай ук район авыл хуҗалыгы һәм азык-төлек идарәсе белгечләре белән очраштылар. Вячеслав Козлов басулардагы хәлләр турында җиткерде. Районда сабан культураларын чәчүгә 41 мең гектар җир бүлеп бирелгән, шуның 37 проценты чәчелгән. Шулай ук чәчүлекләрнең 90%ы тукландырылган. "Зубов В.С." КФХ игенчеләре кырга беренчеләрдән булып чыктылар. Райондагы сөрүлек җирләрнең 60 проценты "Кулон" ҖЧҖ, "Вамин-Татарстан" ҖЧҖ һәм "Архангельское" КФХ" ҖЧҖ кебек эре инвесторлар тарафыннан эшкәртелә. Район башлыгы билгеләп үткәнчә, авыл хуҗалыгы предприятиеләренең күпчелеге кырда тәүлек буена эшлиләр. Быел Яңа Чишмә районында борчак чәчү мәйданы 5 тапкырга арткан.
Әңгәмә барышында Марат Әхмәтов үз фикерен җиткерде: безнең район соңгы корылыктан соң терлекләрнең баш санын тулысынча торгыза алган районнарның берсе. Шулай да район хезмәтчәннәренә авыл хуҗалыгы продукциясе җитештерүне арттыру өстендә эшләргә кирәк. Республикада авыл хуҗалыгы җирләренең 2,7 процентын биләп тә, район нибары 1 процент тулаем продукция җитештерә, дип билгеләп үтте ТР авыл хуҗалыгы һәм азык-төлек министрлыгы башлыгы. Аннан соң министр Татарстанга үз халкын азык-төлек һәм фураж бөртеге (ашлык) белән гарантияле тәэмин итү өчен 600 мең га көзге культуралар булдырырга кирәклеген ассызыклады. "Быел авыл хуҗалыгы товар җитештерүчеләре сезонлы эшкә дизель ягулыгын ташламалы бәядән сатып алдылар. Банк кредитлары өчен процент ставкаларын субсидияләү хисабына алар шактый дәүләт ярдәме алалар. Кызганычка каршы, кайбер хуҗалык җитәкчеләре шушы форсаттан файдаланмадылар", - дип басым ясады Марат Әхмәтов.
ТР Премьер-министры Илдар Халиков билгеләп үткәнчә, хәзер республикада язгы кыр эшләрен оешкан төстә үткәрү һәм әйбәт уңыш алуга нигез салу өчен уңай шартлар тудырылган. Илдар Халиков авыл товар җитештерүчеләренең сорауларына да җавап бирде.
Эшче сәфәрен төгәлләп, Илдар Халиков җирле аграрийлар алдына бурыч куйды. "Барлык юнәлешләрдә дә эшне көчәйтергә, язгы кыр эшләрен билгеләнгән срокта төгәлләргә. Хәзер эшне йомшартырга ярамый, шуңа да һәр җитәкче кампаниянең барышын шәхсән үзе контрольдә тотарга тиеш", - дип ассызыклады ул.
Рәсемдә: М.Әхмәтов, И.Халиков һәм В.Козлов
Следите за самым важным и интересным в Telegram-каналеТатмедиа
Подписывайтесь на наш Telegram-канал "Шешминская новь"
Нет комментариев