Рәхәтләнеп ял иттеләр
Район Сабан туеннан соң икенче көнне, 12 июньдә, Акбүредә бәйрәм булды - авыл җирлеге башкарма комитеты башка оештыручылар белән берлектә нык тырышканнар, Сабан туе бик күңелле һәм оешкан төстә үтте. Азат МУСИН Район җитәкчелеге исеменнән акбүрелеләрне һәм авыл кунакларын район авыл хуҗалыгы идарәсе начальнигы Сергей Баранов бәйрәм белән котлады. Бәйрәмгә...
Район Сабан туеннан соң икенче көнне, 12 июньдә, Акбүредә бәйрәм булды - авыл җирлеге башкарма комитеты башка оештыручылар белән берлектә нык тырышканнар, Сабан туе бик күңелле һәм оешкан төстә үтте.
Азат МУСИН
Район җитәкчелеге исеменнән акбүрелеләрне һәм авыл кунакларын район авыл хуҗалыгы идарәсе начальнигы Сергей Баранов бәйрәм белән котлады. Бәйрәмгә "Татмелиорация" республика берләшмәсе җитәкчесе Әнвәр Залаков та кайткан иде, ул якташларын чын күңеленнән бәйрәм белән котлады, һәммәсенә дә исәнлек-саулык, гаилә иминлеге һәм бәхет теләде.
Теләкләр теләгәннән соң авыл җирлеге башлыгы Җәүдәт Җәләлетдинов Сабантуйны оештыручыларга, авылдан иң яхшы йорт хуҗасына - Әнвәр Насыйровка, үз йорты янында ясаган иң матур чәчәк түтәле өчен Дания Мусинага истәлекле бүләкләр тапшырды һәм Сабантуй программасы белән таныштырды.
Инде берничә ел рәттән Сабан туе бик матур урында, төзекләндерелгән буа янында үткәрелә, урман да ерак түгел, авыл да янәшәдә генә.
Милли бәйрәмне бик яхшы һәм күңелле итеп оештыра алганнар. Авылда туып үскән кешеләр - химаячеләр дә нык булышлык күрсәткәннәр. Сабантуйны алып баручы, ТРның атказанган мәдәният хезмәткәре Рәшит Рәхимов аларның исемнәрен атап үтте. Көрәш һәм башка ярышларда җиңүчеләргә Әнвәр Залаков зур бүләкләр алып кайткан, абыйлы-энеле Фәнил һәм Раил Залаковлар да, район башкарма комитеты да шактый ярдәм күрсәткәннәр, Альберт Рәхимов (ат узышларында катнашучыларның барысы өчен дә бүләкләр), Фәргать Залаков, Насыйх Мортазин, Гөлчәчәк Әхмәтвәлиева, Ирек һәм Рәсимә Мусиннар, Ильяс Сәхабетдинов, Фидания Бикмөхәммәтова, Кадрия Насыйрова, Хәмзә Рәхимов, Гөлсинә Нуртдинова, Азат Мусин, Миннәхмәт Нуруллин, Җәүдәт Җәләлетдинов, Нил Гайфетдинов, Самат Җиһаншиннар матди ярдәм күрсәткәннәр.
Мингаян һәм Ислам Хәйдәровларның үз гаиләләре исеменнән авылдагы медицина хезмәткәрләре Суфия Вәлиуллина һәм Наилә Зариповаларга бүләкләр тапшыру мизгеле бик дулкынландыргыч булды.
Ярышлар һәм уеннар башланыр алдыннан ат узышлары булды, анда 7 ат катнашты. Финишка беренчеләрдән булып "Спектр" атында Данияр Гайфетдинов килде (Чирмешән районының Лашман авылыннан), "Гром" аты белән Зөфәр Хисамов (шул ук районның Иске Кади авылыннан) - икенче, Акбүредән Рәмис Нуриев ("Пчелка" аты) өченче урында. Аларга бүләкләрне Альберт Рәхимов тапшырды.
Аннан соң мәйданда чүлмәк вату, капчык киеп йөгерү, авыш баганадан бүләк алу, күзне бәйләп баудан бүләк кисеп алу кебек ярышлар оештырылды, монда да барлык катнашучылар да бүләкләргә ия булдылар.
Бәйрәм җыр-биюләргә дә бай булды. Республиканың популяр артисты Наил Табанаков хезмәттәшләре белән көн буена кунакларга матур җырларын бүләк иттеләр. Аларга акбүрелеләр - Фидания Бикмөхәммәтова, Гөлсинә Идрисова, Альбина Нурхамәтова һәм башка бик күпләр кушылды.
Буа ярында рәт-рәт булып тезелгән сәүдә нокталарында барлык сатып алырга теләүчеләргә уенчыклар, сувенирлар, шашлык, чәй, тәм-томнар һ.б. тәкъдим иттеләр.
Милли көрәштә катнашу өчен Шахмайдан, Чертуштан, Аксубай һәм Чирмешәннән дә байтак көрәшчеләр килгән иде, шуңа күрә көрәш балалар арасында да 3 авырлык категориясендә үткәрелде. Балалар арасында Шахмайдан Раил Мифтахетдинов (I урын), Түбән Камадан Фәнис Галимов (II урын) һәм Чирмешәннән Алмаз Гатиятов (III урын) җиңү яуладылар.
70 кг-га чаклы авырлыкта 2012 ел район Сабан туе батыры Булат Мусин I урынны яулады, Айнур Әхмәтвәлиев (Акъяр) - 2 нче, Айгиз Ганиев (Шахмай) 3 урында.
85 кг-га чаклы авырлыкта быелгы Чирмешән Сабантуй батыры Ринат Бәдретдинов җиңде, 2 урында Наил Зәйнуллин (Түбән Камадан), Аксубай районы Яңа Ибрай авылыннан Ильяс Зәйдуллин (шулай ук Сабантуй батыры) 3 урынны яулады.
90 кг-нан югарырак авырлыкта Акбүредән берничә тапкыр Сабантуйлар батыры булган Фәнил Залаков җиңде, Динар Гатиятов (Түбән Камадан) - 2 урында, Яңа Ибрайдан Илгиз Нуртдинов 3 урында.
"Авыл көрәшчеләре" арасында Вәсил Латыйпов җиңде, Самат Нуриев - икенче урында.
Баш батырны ачыклау Фәнил Залаков һәм Булат Мусин арасында барды. Әлбәттә инде тәҗрибә һәм осталык җиңүгә китерде, нәтиҗәдә Фәнил Залаков җилкәсенә традицион приз - тәкә салдылар (Гөлчәчәк Әхмәтвәлиева бүләге).
Көрәш буенча җиңүчеләрнең барысы да химаячеләр акчасына сатып алынган бүләкләр алдылар. Акбүредәге Сабантуй менә шулай күңелле үтте, бу мизгелләр күңелләрдә озак сакланыр әле, диясе килә.
Следите за самым важным и интересным в Telegram-каналеТатмедиа
Подписывайтесь на наш Telegram-канал "Шешминская новь"
Нет комментариев