Җирле үзидарә ветераннарын хөрмәтләделәр
РФ Президенты Указына туры китереп (10.06.2012 ел) 21 апрель Җирле үзидарә көне - муниципаль берәмлекләр хезмәткәрләренең һөнәри бәйрәме булып тора. Быел ул беренче тапкыр билгеләп үтелә. Бәйрәм алдыннан район хакимиятендә җирле үзидарә органнары ветераннарын хөрмәтләү булып узды.
Район башлыгы Вячеслав Козлов җыелган ветераннарны, авыл җирлекләре башлыкларын һәм җирле үзидарә органнары хезмәткәрләрен һөнәри бәйрәмнәре белән җылы котлады. Ул бүген залга бик күп еллар партия - совет органнарында, авыл Советларында, башкарма комитет бүлекләрендә хезмәт куйган һәм туган ягыбызның гөрләп алга баруына, районыбыз үсешенә үз өлешләрен керткән кешеләр чакырылды, дип билгеләп үтте.
Хәзер авылда ниләр килеп чыга, халыкта нинди сораулар туа - барысы өчен дә авыл җирлеге башлыгы җаваплы. Соңгы елларда җирле үзидарә органнарында матди-техник база яхшыра, автомобиль, ноутбуклар бүлеп бирелгән, хезмәт хаклары арткан. Район башлыгы барысын да бәйрәм белән тәбрик итеп, исәнлек, гаилә бәхете һәм уңышлар теләде.
Россиядә җирле үзидарә формалашуы һәм үсеше турындагы тарихи информация белән район Советында оештыру бүлеге начальнигы Альбина Әхмәтҗанова чыгыш ясады. Россиядә теге яисә бу дәрәҗәдәге җирле үзидарә аның тарихы дәвамында яшәп килгән. Аның үсешенә Александр II-нең земский (1864 ел) һәм шәһәр (1870 ел) реформалары башлангыч куйган. Эшләр белән идарә итүче губерна һәм өяз земство сайлау җыелышлары оештырылган.
1917 елгы революциядән соң хакимиятне оештыру нигезенә советлар системасы бердәмлегенең түбәннән югарыга кадәр принцибы салынган. Җирле үзидарә идеясына 1980 еллар азагында илдә дәүләт власте реформасы булу сәбәпле әйләнеп кайтканнар. Ә "РФ дә җирле үзидарәне оештыруның гомуми принциплары турында"гы Федераль закон (2003 ел) муниципаль реформага башлангыч куя (сала).
Безнең районда 16 муниципаль берәмлек бар, анда 87 кеше эшли, шуның 90%ы югары белемгә ия. Бүген җирле үзидарә халык хакимиятенең мөһим бер өлеше, җирле һәм гомумдәүләт бурычларын хәл итүдә көчле, тәэсир итәрлек инструмент булып тора.
Аннан районның дәүләт һәм муниципаль хезмәт ветераннары район башлыгы кулыннан намуслы хезмәтләре өчен Рәхмәт хатлары, чәчәк бәйләмнәре һәм акчалата премияләр алдылар, истәлеккә бергәләп фоторәсемгә дә төштеләр. Тантаналы чарага чакырылганнар исәбендә 15 һәм аннан да озаграк еллар җирле үзидарә органнарында хезмәт куйган ветераннар иде (35-40 ел эшләүчеләр дә бар).
Җирле үзидарә органнарында 34 ел хезмәт куйган Анастасия Козлова ветераннар исеменнән район җитәкчелегенә рәхмәт сүзләре җиткерде. Ул халык иминлеген арттыруга юнәлдерелгән, һәрвакыт күренеп тора торган булмаса да, әмма бик кирәкле эшчәнлек алып баручы җирле үзидарә органнары хезмәткәрләренең барысына да исәнлек, сабырлык һәм уңышлар теләде.
Автор фотосы
Азат МУСИН
Следите за самым важным и интересным в Telegram-каналеТатмедиа
Подписывайтесь на наш Telegram-канал "Шешминская новь"
Нет комментариев