Бишкөнлек алдынгыларына премияләр тапшырдылар

автор, 12 сентябрь 2017 - 07:35

601

Игеннәрне урып-җыюда комбайнчылар һәм шоферлар арасындагы хезмәт ярышының чираттагы бишкөнлегенә йомгак ясалган.

Бишкөнлек алдынгыларына премияләр тапшырдылар

"Кулон" а/ф-дан комбайнчы Евгений ЕЛЕСИННЫҢ бишкөнлек күрсәткечләре яхшы. "Лига-360" комбайнында ярдәмчесе Михаил СТЕПАНОВ белән 275 тонна бөртек суктырганнар (урып-җыю эшләре башланганнан бирле - 1715 тонна).

Шул ук хуҗалыктан һәм "Нью-Холланд" комбайннарында эшләүче комбайнчылар арасында бишкөнлек алдынгысы Рәйхан ХӘЛИУЛЛИН ярдәмчесе Фәрит ГАФИЯТУЛЛИН белән 5 көндә 213 тонна бөртек суктырганнар (урып-җыю эшләре башланганнан бирле - 906 тонна). "Кулон а/ф-дан абыйлы-энеле Владимир һәм Александр ГАРЕВЛАРНЫҢ урып-җыю эшләре башланганнан бирле суктырылган бөртек күләме 2633 тоннага җиткән. "Акрос - 580" комбайнында алар 5 көндә 441 тонна бөртек суктырганнар һәм рәттән берничә бишкөнлек алдынгылары булып торалар.

Ә менә "Нива" һәм "Енисей" комбайннарында эшләүче комбайнчылар арасында "Вәлиев Ф.Р." КФХ-дан Михаил КОЗЫРЕВ алдынгылыкны бирми. Урып-җыю эшләрен үзендә төгәлләгәч, хәзер ул башка фермерларның кырларында эшли һәм урып-җыю эшләре башланганнан бирле 1270 тонна бөртек суктырган.

Шоферлар арасында "Кулон" а/ф-дан Марат ГАЛИМОВ бишкөнлек җиңүчесе булган, ул МАЗ а/м-да урып-җыю эшләре башланганнан бирле барлыгы 2535 тонна бөртек ташыган.

Җиңүчеләрнең барысына да кызыл әләмнәр һәм акчалата премияләр тапшырылган.