«Аҗаган» клубы откан грант гамәлгә ашырыла

Проект тегү машиналары һәм барлык кирәкле тегү кирәк - яраклары белән җиһазландырылган тегү остаханәсе булдыруга юнәлдерелгән, болар барысы да грант акчасына сатып алынган. Моннан тыш, проектор һәм асылмалы экран сатып алынган, алар уку процессында актив кулланыла. Тегү остаханәсендә дәресләр тегү машиналары һәм алар белән эшләгәндә куркынычсызлык кагыйдәләре белән танышудан башлана. Остаханәгә 14 укучы килә, алар кызыксынып һәм бик теләп тегү эшенең нечкәлекләрен үзләштерәләр.
«Дәресләрдә без тегәргә, кисәргә шулай ук милли орнаментлар ясарга өйрәндек. Клубта яңа түгәрәк барлыкка килүенә бик шатмын», - дип уртаклаша түгәрәккә йөрүчеләр.
Бүген биредә шөгыльләнүчеләр өчен тегү машинасында эшләү буенча мастер-класс үткәрелгән.

Каникуллардан соң балаларга проект эшен башкарырга - милли орнаментлы элементлар һәм эшләнмәләр уйлап табарга һәм булдырырга туры киләчәк, ул проектның соңгы этабында тәкъдим ителәчәк, тәрбияләнүчеләрнең эшләреннән күргәзмә - ярминкә оештырылачак.

Түгәрәк җитәкчесе Г.Г. Вәлиева сүзләренчә, мондый эш тегү күнекмәләрен ныгытырга һәм тәрбияләнүчеләрнең иҗади потенциалын ачарга мөмкинлек бирәчәк.