Армиядә хезмәт итү һәм бала карау элеккегечә стажга кертелә

-Бала яшь ярымга кадәр тәрбияләнгән, армиядә хезмәт иткән, инвалид баланы һәм бала чактан 1нче группа инвалидны, 80 яшькә җиткән пенсионерны карау чорлары, гражданин бу вакытта эшләмәвенә карамастан, иминият стажына кертелә.
Моннан тыш, мондый чорның һәр елы өчен гражданинга билгеле бер баллар саны исәпләнә. Әйтик, беренче бала тәрбияләгән өчен – 1, 8 балл, икенче бала өчен – 3,6 балл, өченче һәм дүртенче бала өчен -5,4 балл; чакырылыш буенча һәр ел армиядә хезмәт иткән өчен – 1,8 балл.
Әлеге чорлар, алар алдыннан булган яки алар артыннан килүче эш чорлары булса (аларның дәвамлылыгына карамастан), стажга исәпләнә. Пенсия билгеләгәндә, шул исәптән иминият булмаган чорларны да исәпкә алып, стажны санау тәртибендә бернинди дә үзгәрешләр булмаячак.
 2019 елдан картлык буенча иминият пенсиясенә вакытыннан алда чыгу өчен яңа нигез барлыкка килде. Моның өчен гражданнарга озак сроклы иминият стажына ия булырга кирәк: ир – атлар өчен – 42 елдан да ким түгел, хатын-кызлар өчен-37 елдан да ким түгел. Әлеге норма пенсиягә яңа пенсия яше җиткәнче 2 ел алдан (әмма ир-атлар өчен – 60, хатын-кызлар өчен 55 яшьтән дә иртәрәк түгел) чыгарга мөмкинлек бирә.
Әйтергә кирәк, бу очракта стажга эш һәм вакытлыча эшкә яраксызлык (больничныйлар) чоры гына кертелә. Ә менә бала карау һәм армиядә хезмәт итү вакыты вакытыннан алда пенсия алу хокукын бирүче озак вакытка исәпләнгән иминият стажына кертелми.
Әмма бу һәм башка чорлар (әйтик, эшкә сәләтсез затны карау; контракт буенча хәрби хезмәт үтүче хәрби хезмәткәрләрнең тормыш иптәшләре, алар эшкә урнаша алмаган урыннарда яшәү) пенсия балларында бәяләнә һәм пенсия күләмен билгеләгәндә иминият стажына кертелә.  Шуңа күрә гражданнарның барлык пенсия хокуклары озак сроклы стаж өчен пенсия билгеләгәндә исәпкә алына: бер чор пенсиягә хокукны билгеләү өчен, икенчесе — пенсия күләмен исәпләү өчен.