Черемухово Бистәсенең чыгарылыш сыйныф укучылары 50 елдан соң очрашканнар

50 ел элек мәктәп ике унынчы сыйныф белән саубуллашты, һәрберсендә 30дан артык укучы иде. Тик язмыш шулай иткәнме, әллә инде тормыш мәшәкатьләре сәбәп булганмы - сыйныфташлар очрашуына бары тик 18 кеше генә килә алды.

Соңгы кыңгырау әле күптән түгел генә чыңлаган кебек, ә кызлар һәм малайлар кем кайда - Татарстаннан алып Себер якларына кадәр  таралыштылар. Һәм менә 50 ел үткәч, бер-берсен күрү һәм мәктәптә уку чорының якты, онытылмас мизгелләрен искә алу өчен кабат җыелдылар. Очрашуда катнашучылар фикеренчә, уку дәверендә ике сыйныф та иң яхшылар рәтендә булган. Алар укуда да, спортта да иң көчлеләр исемен йөрткән, яхшы укып кына калмаганнар, җәмәгать тормышында да үрнәк, пионер, ә аннары инде комсомол эшләрендә дә әйдәп баручы булганнар. Барысы да совхоз кырларына бәрәңге, кишер, чөгендер, мәк җыярга баруларын хәтерли. Макулатура белән металлолом да җыйганнар. Күчмә вымпел өчен көрәшүләрен һәм елның иң яхшы ике сыйныфы буларак, Ульяновскига һәм Татарстан башкаласы - Казанга түләүсез экскурсиягә баруларын да искә алдылар.

Әлбәттә, ул вакыттан бирле инде күп нәрсәләр үзгәргән, кемдер кыюрак булырга өйрәнгән, кемдер хыялындагы барлык нәрсәләргә дә ирешә алган, ә кемдер  яулый алмаган үрләргә омтылуын әле дә дәвам итә. Чыгарылыш сыйныф укучылары арасында алдынгы эшчеләр, бригадирлар, инженерлар, укытучылар, медицина хезмәткәрләре, фән эшлеклеләре, Россия һәм Татарстан Республикасының атказанган тренерлары да бар.

Чыгарылыш сыйныф укучылары фикеренчә, үзләренең уңышлары белән алар директор С. Я. Малакаев җитәкчелегендәге (соңыннан ул Казан математика мәктәбе җитәкчесе итеп күчерелгән) туган мәктәпләренә һәм анда формалашкан ныклы педагогик коллективка бурычлы.

Укучылар өчен зур көч куйган һәм аларның һәркайсына җан җылысын бүләк иткән барлык укытучылар да зур хөрмәт белән искә алынды. Биргән белемнәре һәм яхшы киңәшләре өчен рәхмәт аларга.

Әйтик, безнең математика укытучысы Мария Григорьевна Отавина да озак еллар дәвамында кече Ватанга һәм балаларга хезмәт итү үрнәге булып тора. Кызганычка каршы, ул очрашуда катнаша алмады (авырап китте) һәм без аның өенә бардык, сөйләштек, бүләкләребезне тапшырдык.  

Шунысы куанычлы, бүген дә Черемухово урта гомуми белем бирү мәктәбе Татарстанның алдынгы мәктәпләренең берсе.

Черемухово Бистәсенә озак кайтмыйча торган кешеләр Бистәбезнең матурлыгына сокландылар, ул эллекечә матур, ә яшеллеккә һәм чәчәкләргә күмелгән мәктәпнең заманча бинасы (мәктәп яны участогы да) авылның аерым бер бизәге булып тора, диделәр.

Мәктәп каршында әле күптән түгел генә төзелгән христиан чиркәве урнашкан. Шөкер, әйләнә - тирәдә чисталык һәм тәртип хөкем сөрә!

Авылның аерым күрке – шифалы су һәм ләм чыганагы, без анда да булдык.

Бигрәк тә бала чагыбызны «оныта алмаслык» иткән юлларны һәм мәңгелек пычракны да билгеләп үтәсе килә. Ничә тапкырлар Яңа Чишмәгә автобусларга утырып яки җәяү барырга туры килгән иде бит. Ә бүгенге юл - ул бала чагыбызның хыялы дип әйтергә дә була.

Очрашуыбыз тиз тәмамланды, әмма без тагын да күрешербез дигән өмет белән саубуллаштык.

Без Яңа Чишмә районы хакимиятенә һәм, беренче чиратта, район башлыгы Вячеслав Михайлович Козловка авылыбызга игътибарлы мөнәсәбәте, башкарылган һәм әле тагын да башкарылачак эшләре өчен чиксез рәхмәтлебез.

Барлык чыгарылыш сыйныф укучылары исеменнән Александр Кузнецов һәм Тамара Иголкина.