Яңа Чишмә хәбәрләре
  • Рус Тат
  • Җилдән җитез Роза апа

    Тиешле еллар эшлим дә, туган якларыма кайтып төпләнәм, дип, күз күрмәгән, колак ишетмәгән якларга Уфада алты айлык элемтәчеләр курсын тәмамлап, юллама буенча килгән, хезмәт юлын почта бүлекчәсе начальнигы булып башлаган (сүз уңаенда, бер урында 38 ел хезмәт куйган!) кызга Шахмай авылында ярты гасыр тоткарланырга туры килә. Хәер, ул әле дә...

    Гомер юлдашы итеп сайлаган Рәмисе күптән бакыйлыкка күчкән, кызларының да үз тормышы: башлы-күзле булганнар, инде үзләре әни, туган ояларыннан еракта - Чаллы шәһәрендә көн күрәләр. Шулай да, Роза ханым ялгыз түгел. Аның өчен өзелеп торган күршеләре, дуслары бар. Шулай булмый ни, Роза Шәмсетдин кызы үзе дә бит авылдашлары турында бары уңай фикердә генә: Ходайга шөкер, барысы белән дә бертуганнардай яшибез, ди. Балаларын, оныкларын да (алар дүртәү, барысы да югары белемле, икесе инде тормышлы да икән) мактап туя алмый. Ул үзе дә кешеләрне, тормышны ярата торган, оптимист кеше. Хәрәкәттә - бәрәкәт, диләр бит. Роза ханым үз эченә бикләнеп яшәүне күз алдына да китерә алмый. Төскә-биткә үз яшеннән байтакка яшьрәк күренүе шуларның нәтиҗәседер дә әле. Актив тормыш алып баруы да бүгенге көндә әле кызларга биргесез булуына (күз генә тия күрмәсен) тәэсир итми калмагандыр.

    Редакциядә без аның белән күптәнге танышлар күк очраштык, гәрчә беренче генә тапкыр күрешүебез булса да. Ул безнең үтенеч буенча фоторәсем китергән иде. Кеше йөрәгенә юлны, уртак телне тиз таба белүче Роза ханым белән әңгәмә коруы да бик җиңел булды. Инде олы яшьтә булуына карамастан, бүгенге көндә дә сәхнә түреннән төшмәгән Роза Шәмсетдин кызы сәнгатькә бала чактан гашыйк. Үзе дә бик матур җырлый, бии - нәселдән килгән, әти-әнисеннән бирелгән сәләт. "Татарстан-Яңа гасыр" каналында районнардан һәвәскәр җырчылар арасында ретро җырлардан торган бәйге оештырылуы игълан ителеп, "Җырлыйк әле" музыкаль тапшыруының проект авторы, оештыручысы һәм редакторы Нәҗип Бәдретдинов безнең районнан әлеге бәйгедә катнашачак җырчыларны сайлаганда араларында Роза ханым да булуын, аның "Сагыну" җырын башкарып, II турга узуын, анда өздереп "Мәк чәчәген" җырлавын (сүз уңаенда, безнең җырчыларның алексеевскийлыларга бирешмәүләрендә Роза ханымның өлеше дә зурдыр) газета укучыларыбыз күреп-ишетеп белә. Яшьрәк чагым булса, клуб хезмәткәре булып эшләр идем, хәзер мөмкинлекләр күп, бары оештыра, халыкны сәнгать дөньясына җәлеп итә белү генә кирәк, ди ул. Чыннан да, андыйларга ут чаткысыдай, диләр. Роза ханымның әле бүген дә энергиясе, дәрте ташып тора. Күңеле җыр-биюдә генә икән дип уйлый күрмәгез, Роза Шәмсетдин кызы намазын да калдырмаска тырыша, ифтар, коръән уку мәҗлесләре дә үткәргәли. Бертуганнары (алар 5әү) да исән-сау, алар янына барып кайтырга да вакыт таба, үзе белән эшләгән хезмәттәшләренең хәлен белергә дә онытмый, бигрәк тә Чертушта яшәүче, ул елларда почтальон булып эшләгән 81 яшьлек Зәйтүнә әби Галиева янында еш була. Ул да минем кебек ялгыз бит, ди. Гомер иткән авылындагы тирә-күрше әбиләрне дә онытмый. Хезмәт урыныннан лаеклы ялга чыккач та әле ул социаль яклау бүлеге аша ике әбигә хезмәт күрсәтә, Шәмсенур апа Гайнуллинаны үзем карап җирләдем, ди. Эшләгән дәвердә Роза ханым 14 кызга оператор эше серләрен төшендерә. Кайда гына хезмәт куйсалар да, эшкә өйрәткәне өчен алар бүген дә аңа рәхмәтле. Роза ханымның күршесе Касыйм ага Төхфәтуллиннар гаиләсенә Акбүредән килен булып төшкән Гөлия без элемтәчеләр әзерләүче уку йортында өйрәнмәгән нәрсәләрне Роза апа кул астында эшләгәндә белдек, дип искә ала.

    Яшьрәк чакта күпләп мал-туар тоткан Роза ханымның ишегалды бүген инде тынып калган. Бакча эшләре белән мәшгульмен, ди, берсеннән-берсе матур чәчәкләр үстерә.

    Соң булса да, уң булсын, диләр, Роза апа, шушы көннәрдә генә билгеләп үтелгән һөнәри бәйрәмегез белән тәбрик итәбез, сезнең кебек тормыштан ямь, тәм табып яши белү үзе бер бәхеттер. Ходай озын гомер бирсен сезгә, бакчагыз әле озын-озак еллар шулай гөлчәчәкләргә күмелеп утырсын, җылылык бөркелеп торган өегезгә илтүче сукмакта тирә-күрше, дусларыгыз эзе суынмасын, алда да сәхнә түрендә авылдашларыгызны моңга күмеп, сокландырып яшәргә язсын, дигән теләктә калабыз.

    Фидания ВӘЛИУЛЛИНА

    Иң мөһим һәм кызыклы язмаларны Татмедиа Telegram-каналында укыгыз


    Нравится
    Поделиться:
    Реклама
    Комментарии (0)
    Осталось символов: