Җирле үзидарә көне уңаеннан тантана

Анда гаилә юбилярлары һәм ире яки хатыны озак еллар җирле хакимият органнарында эшләүчеләр чакырылган иде.

Моннан тыш, 14 яше тулган яшүсмерләр өчен патриотик акция - изге теләкләр һәм үгет-нәсыйхәтләр теләп, паспортлар тапшыру тантанасы да оештырылды.

Гаилә парлары дүрт милләт вәкилләре иде: керәшен, рус, татар һәм чуаш. Шуңа күрә музыкаль бүләкләр дә бу халыкларның телләрендә яңгырады. Чараны Илсөяр Дәүләтшина татар җыры белән башлап җибәрде, чара барышында «Илем» чуаш ансамбленнән Владимир Охотников, Ленинодан яшь йолдыз Дарья Зайцева да чыгыш ясады.

Быел гаилә тормышының 45 еллыгын Ленинодан ирле-хатынлы Владимир һәм Раиса Леонтьевалар билгеләп үтә. Дуслык мәктәп эскәмиясеннән башланган, соңыннан ул мәхәббәткә әверелгән. Гаилә башлыгы бухгалтер һөнәрен ала, ә хатыны медик була һәм ул туган авылына эшкә кайта. Акушер, ә аннары ФАП мөдире була. Аның хезмәт стажы - 35 ел. Намуслы хезмәте өчен аңа «Россия Федерациясе Сәламәтлек саклау отличнигы» исеме бирелә. 1984 елдан 13 ел буе Владимир Дмитриевич авыл советы рәисе булып эшли, аннары «Ямашнефть» НГДУга күчә. Аның хезмәт стажы 41 ел. Намуслы хезмәте өчен район Советының һәм нефть оешмасының Мактау грамоталары белән бүләкләнә. Хәзер икесе дә лаеклы ялда, өч бала тәрбияләп, өч оныкның уңышларына шатланып гомер итәләр, актив тормыш рәвеше алып баралар: скандинавча йөреш, чаңгыда йөрү, дару үләннәре җыю белән мавыгалар, җирле гыйбадәтханәгә йөриләр, ә Раиса Александровна «Сурекэ» фольклор ансамблендә җырлый да әле.

Архангел Бистәсеннән Александр һәм Ольга Беляевларның гаилә стажы 32 ел. Ольга Александровна 28 ел җирле КФХда бухгалтер булып эшли, хәзер авыл җирлеге башкарма комитеты секретаре булып эшли. Александр Леонидович 25 ел шул ук КФХда шофер булып эшли, хәзер - нефтьчеләрдә ООУ операторы. Тату гаилә ике бала үстерә, оныклары бар. Уллары Казанда шәхси эшмәкәр булып эшли, кызы Ульяновск өлкәсендә инглиз теле укытучысы. Беляевлар эшләргә дә, зур йорт яны участогы белән шөгыльләнергә дә өлгерәләр, бал кортлары тоталар, терлек асрыйлар.

Илгизәр һәм Гөлия Сабировлар гаиләсе Беляевлардан бер ел алдарак гаилә кора. Илгизәр Тәбрис улы тумышы белән Шахмай авылыннан.  Армиядән соң Әлмәт физик культура техникумын тәмамлый һәм Ленино мәктәбендә физкультура укытучысы булып эшли башлый, анда инде 34 ел эшли. 2003 елда читтән торып КамГАФСиТны үз белгечлеге буенча тәмамлый. Шул ук елда «ТР мәгарифендә казанышлары өчен» күкрәк билгесе белән бүләкләнә. Мәгариф министрлыгы, Спорт һәм туризм министрлыгы, район хакимияте, Яшьләр һәм мәгариф бүлекләренең күп санлы грамоталары бар. 2021 елда РФ Мәгариф Министрлыгының Мактау грамотасы белән бүләкләнә. Аның тәрбияләнүчеләре төрле дәрәҗәдәге ярышларда авыл, мәктәп һәм район данын яклыйлар, һәрвакыт призлы урыннар алалар.

   Гөлия Халит кызы Чаллы Башы авылыннан. 9 һәм 10 сыйныфларда Шахмай мәктәбендә укый, анда булачак ире белән таныша. КФЭУны тәмамлагач, Чистай сәгать заводында икътисадчы булып эшли. Бер елдан соң кияүгә чыга һәм ире янына Ленинога күченә. Башта «Рассвет» СПКда баш икътисадчы, аннары баш бухгалтер, аннары 11 ел «Татарстан агрофирмасы» ҖЧҖдә бухгалтер һәм юрист булып эшли. 1995 елдан ҮСК рәисе булып тора, 2018 елда ТР Үзәк сайлау комиссиясенең Мактау грамотасы белән бүләкләнә. Җиденче ел инде Ленино авыл җирлеге башкарма комитеты секретаре булып тора. Кайда гына эшләсә дә, һәр җирдә үзен җаваплы хезмәткәр, грамоталы белгеч, яхшы оештыручы итеп күрсәтә. Сабировлар ике бала тәрбияләп үстергәннәр, ике онык тәрбияләүдә ярдәм итәләр.

 21 апрельдә Чуаш Чабаксарыннан Каришевлар гаиләсе бергә гомер итүләренең 16 еллыгын билгеләп үткән. Ольга Леонтьевна хезмәт эшчәнлеген «Закамский» совхозында бухгалтер булып башлый, анда 22 ел эшли. Хәзер инде 17 ел ул Чабаксар авыл җирлеге башкарма комитеты бухгалтеры. Үз эшен бик ярата, авылдашлары хөрмәт итә. Ире Анатолий «Игенче» ҖЧҖдә механизатор булып эшли. Аларның гаиләсендә өч бала һәм шул ук санда оныклар бар. 

Район башлыгы урынбасары, «Мәрхәмәт-Милосердие» хатын-кыз депутатлар иҗтимагый берләшмәсе җитәкчесе, район хатын-кызлар советы рәисе Надежда Попкова әлеге гаиләләрне юбилейлары һәм җирле үзидарә көне белән котлады. Аларга Рәхмәт хатлары, чәчәкләр һәм бүләкләр тапшырды. 

Чараны патриотик акция - алты яшь яңачишмәлегә паспортлар тапшыру тантанасы тәмамлады. Балалар үз тормышларының төп документын Надежда Попкова һәм миграция хезмәте начальнигы Галина Юрьева кулыннан алдылар. Паспорт тышлыгын, блокнот һәм истәлеккә каләмне аларга «Бердәм Россия» БСПнең җирле бүлекчәсе башкарма комитеты җитәкчесе Светлана Васильева бүләк итте. Мусаева Камилә, Хассарова Айсылу, Бикбова Алсу, Жуков Юрий, Зубова Дарья, Фомичев Егор РФның тулы хокуклы гражданнары булды. Паспортны горурлык белән кулларына тотып, Россия Федерациясе, ә аннары Татарстан гимнын басып тыңладылар. 

 Надежда Попкова һәм чараны алып баручылар аларны җылы теләкләр теләп ихластан котладылар. Чыгыш ясаучылар бу документның балалар тормышында мөһимлеген билгеләп үттеләр һәм әти-әниләренең фамилиясенә тап төшермичә, үз илләренең лаеклы гражданнары булачакларына ышаныч белдерделәр.