Кайгыртучан әни һәм талантлы педагог
Әниләр көне алдыннан әлегә чаклы Тубылгы Тау урта мәктәбендә яраткан фәнен - математика укытучы Мөсәлия Вәгыйз кызы Хәбибуллина үзенең 70 яшьлеген - юбилеен билгеләп уза. Үз гаиләсендә ул өч бала тәрбияләп үстергән, хәзер 6 оныгын тәрбияләүдә булыша. Евгений СТАРОВ
Мөсәлия Вәгыйз кызының бөтен гомере үсеп килүче буынга тәрбия бирү белән бәйле. 47 ел укыту дәверендә ул күпме укучыга тормышка юллама биргән, күбесе белән әле дә элемтәдә тора, төгәл фәннәргә булган мәхәббәтен укучыларына да тапшыра алган. М.В. Хәбибуллина озак еллар Тубылгы Тауда хатын-кызлар Советын җитәкләгән, актив гражданлык позициясе белән яшь буынны тәрбияләүдә авылдашларына булышкан. Олы яшьтә булуына карамастан, Мөсәлия Вәгыйз кызы әле дә квалификациясен күтәрү өстендә эшли, төрле журналлардан педагогика өлкәсендә булган яңалыкларны өйрәнә, соңгы елларда компьютерны, Интернетны үзләштергән. Дәресләрдә алган ноутбуктан бик оста файдалана, югары сыйныф укучыларына математика фәненнән тирәнтен белем бирә, аларны БДИга әзерли. Ул укыткан укучылар уңышлы гына ВУЗларга керәләр, алган белемнәре өчен укытучыларына рәхмәт белдерәләр. Тәҗрибәле педагог үзенең тәҗрибәсен һәм белемен яшь укытучыларга бирә.
Биш ел элек без Мөсәлия Вәгыйз кызының биографиясе белән газетабыз укучыларын таныштырган идек инде, шуңа күрә кайбер фактларга гына тукталып үтәм. Ул 1941 елның 25 ноябрендә Югары Никиткино авылында (авылның элеккеге исеме) туа, туган авылында җидееллык мәктәпне тәмамлый, куяннар фермасында эшли, Зирекле урта мәктәбендә укый, Алабуга педагогия институтын тәмамлый, юллама буенча Чистай районында эшли. Эш сөючән Әсәдулла атлы егет белән танышып туй үткәрәләр, 22 ел Ленино урта мәктәбендә эшли. Шушы еллар эчендә Мөсәлия Вәгыйз кызы үзен талантлы педагог итеп таныта, авылның җәмәгать тормышында актив катнаша һәм 1986 елда аның эше хөкүмәтнең югары бүләге - "Почет билгесе" ордены белән бәяләнә. Моңа кадәр ул "Хезмәт ветераны" медале белән бүләкләнгән була. 1989 елдан башлап М.В. Хәбибуллина Тубылгы Тауда эшли. Үзенең намуслы хезмәте өчен ул берничә тапкыр төрле Мактау грамоталары, "Мәгариф өлкәсендәге казанышлары өчен" дип аталган күкрәк билгесе белән бүләкләнә, быел Укытучылар көнендә ул РМБнең Рәхмәт хатына лаек була.
Ире белән бергәләп Мөсәлия Вәгыйз кызы өч бала тәрбияләп үстерә. Кызлары да әниләре сайлаган юлдан китә: олы кызы Әлфия Яр Чаллыда химия һәм биология, ә кечесе Гөлфия Яңа Чишмәдә рус теле һәм әдәбияты фәннәреннән белем бирә, улы Рәфис ветеринария берләшмәсе начальнигы булып эшли. Балалары һәрвакыт әниләренең хәлен белешеп торалар, аның янына еш кайталар, хуҗалык эшләрендә булышалар.
Без М.В. Хәбибуллинаны юбилее һәм Әниләр көне белән чын күңелдән котлыйбыз, аңа исәнлек-саулык, үсеп килүче буынны тәрбияләүдә уңышлар һәм иминлек телибез.
Следите за самым важным и интересным в Telegram-каналеТатмедиа
Подписывайтесь на наш Telegram-канал "Шешминская новь"
Нет комментариев