Красная Зорька дигән авыл бар иде

Авылга узган гасырның 30 нчы елларында Рус Волчья (хәзерге Волчья Бистәсе) авылыннан чыккан кешеләр нигез салган. Ул Тат. Волчья (хәзер Акбүре) һәм Черемухово Бистәсе  авыллары арасында кечкенә генә елга ярында урнашкан.

Коллективлашу чорында авылда «Красная Зорька» колхозы оеша, авыл үзе Рус Волчья авыл Советы составына кергән.

Колхозда бөртекле культуралар иккәннәр, бәрәңге, киндер үстергәннәр. Шулай ук ике ат сарае, бозаулар һәм сарык абзары булган, савым сыерлары юк. Колхоз алдынгы хуҗалыклар рәтендә саналган.

Авылда 55-60 йорт, көндәлек товарлар кибете булган. Гаиләләрдә 6-7шәр бала булган. Халыкның күпчелеге умарта тоткан, мал-туар асраган.

Авылда башлангыч мәктәптә беренче укытучы Елизавета Никулина була.

Бөек Ватан сугышы елларында күп кенә ир-атлар фронтка китә. Комбайннар һәм тракторлар штурвалы артына хатын-кызлар утырган. Алар арасында Евдокия Лобова, Александра Улитина да бар. 29 фронтовик сугыштан исән-сау кайткан, ә 6 кеше сугышта һәлак булган.

Авылда зират булмаган, үлгәннәрне Рус Волчья авылында җирләгәннәр.

Узган гасырның 50 нче еллар ахырында вак хуҗалыкларны эреләндерү башланган һәм 1957 елда Красный Октябрь поселогы үзәге белән «Красный Октябрь» совхозы оештырыла (бирегә шулай ук Тат. Волчья, Рус Волчья, Новопоселенная Лебедка, Сөлчә-Баш һәм Красная Зорька торак пунктлары керә).

Хуҗалыкларны эреләндерү буенча мондый дәүләт сәясәте бөтен ил буенча алып барылды, кече авыллар перспективасыз санала иде. Ул елларда бөтен Советлар Союзы буенча меңләгән кече торак пунктлар юкка чыккан. Вакыт мондый сәясәтнең акланмавын күрсәтте.

Юкка чыккан авыллар исемлегенә Красная Зорька да керә. Авыл халкы еллар буе яшәгән урыннарны ташлап китә башлый. Күпләр Рус Волчья, Красный Октябрьгә күченгән, кайберәүләр, гомумән, кече ватаныннан ук киткәннәр. Авыл 70 нче еллар башында бушап калган.

Тагын берничә дистә ел биредә «Буревестник» совхозы Тат. Волчья бүлекчәсенең кыр станы һәм сыерлар өчен җәйге лагерь булган. Озак еллар инде кыргыйланган алма, чия, карлыган һ.б. җимешләрне татып карарга була иде. Хәзергесе вакытта монда Акбүре халкы үз терлекләрен көтүгә йөртә.

Һәм менә ярты гасырдан соң Красная Зорька авылының элеккеге кешеләре үзләренең ата-бабаларының яшәү урынын мәңгеләштерергә булганнар. Анатолий Батенев (Чистайда яши) һәм Виктор Калмыков (Яңа Чишмәдә яши) әлеге карарның инициаторлары булган, аларның әти-әниләре бу авылда яшәгән.

Июнь урталарында элеккеге авыл урынына әлеге торак пункттан 70тән артык кеше җыелган. Күбесе балалары, оныклары белән килгән. Хәзер алар Яр Чаллы, Чистай, Түбән Кама һәм Яңа Чишмә районында яшиләр. Чарага район башлыгы Вячеслав Козлов та килгән иде. Ул билгеләп үткәнчә, бу бик яхшы һәм игелекле инициатива, без үз тарихыбызны, тамырларыбызны белергә һәм буыннан-буынга тапшырырга тиеш. Ул шулай ук Виктор Калмыковка һәм Анатолий Батеневка район башлыгының Рәхмәт хатларын тапшырды.

Барлык җыелучылар концерт программасы карадылар, өстәл артында бик җылы аралаштылар. Хәзер элеккеге авыл урынында истәлек билгесе – авыш тәре урнаштырылган.

- Минем әти-әнием Красная Зорька авылында яшәде һәм 60 нчы еллар ахырында Рус Волчьяга күчте, - ди Виктор Калмыков. – Шулай булгач, тамырларым минем монда. Без чишмәне төзекләндерергә (ул әле «сулый») һәм уңайлы беседка куярга планлаштырабыз. Ә якташлар белән ел саен Красная Зорькага җыелырга булдык.

Шулай булыр дип өметләнәбез.