“Мәктәп-җанымның яртысы”
Яңа Чишмә гимназиясе директоры Татьяна Николаевна Сырованы Яңа Чишмәдә бүген белмәгән кеше юктыр, мөгаен. Бу мәктәптә ул педагогик хезмәтен 1972 елда тарих укытучысы буларак башлый, аннары 25 елдан артык завуч булып эшли һәм соңгы 7 елда мәктәпне җитәкли. Иртәгә, 27 октябрьдә, Татьяна Николаевна үзенең түгәрәк датасын - юбилеен билгеләп үтә.
Мәктәп һәрчак аның җанының бер өлеше була. Ул үзенең 40 ел гомерен мәктәпкә багышлаган. Авыл халкының күпчелеге шушы мәктәп юлын үткән һәм ул һәркайсына әниләрчә кайгыртучанлык күрсәткән. Ул үзенең барлык укучыларын белә һәм яхшы хәтерли. Бу мәктәпкә аның күпме вакыты, хезмәте, түземлелеге сарыф ителгән, ул шушы мәктәп белән бер бөтен.
Татьяна Николаевна райондагы иң күп санлы педагоглар һәм укучылар коллективын, югары укыту - техник чараларга баетылган мәктәп-гимназияне җитәкли. Һәм боларның барысы белән дә идарә итү җиңелләрдән түгел. Энергияле, гадел педагог уку-укыту, хуҗалык эшләрен, административ проблемаларны уңышлы хәл итә. Педагог яшь хезмәттәшләре белән үзенең бай тәҗрибәсе, белеме белән уртаклаша, укучылар өчен акыллы остаз һәм тәрбияче булып кала. Сәләтле җитәкче буларак, куелган максатларга ирешүдә коллективны туплый белә. Ул укытучы ял итәргә тиеш булган җәйге чорда түгел, ә сентябрьдә, яңа уку елына бар да әзер булгач кына ял итә. Быелгы җәй аеруча да "кызу" булган, мәктәпкә капиталь ремонт эшләренә гимназия 6 млн. сум акча үзләштергән. Директорга байтак нервыланырга туры килгән, тик шулай да ремонтны үз вакытында төгәлли алганнар.
Татьяна Николаевна үзенең барлык проблемаларын үзе хәл иткән һәм үзе чишә. Үзенекен генәме әле? Аңа ярдәм, киңәш сорап мөрәҗәгать итүчеләр дә байтак, көченнән килгән кадәр ул барын да эшләргә тырыша. Яңачишмәлеләр аны яратып, ихтирам белән телгә алалар. Ул районда иң әйбәт педагогларның берсе, "Татарстан Республикасының атказанган укытучысы" исемен йөртә, алган грамоталары һәм бүләкләре дә бихисап. Шулай да ул үз мәктәбе укучылары ирешкән казанышлар белән күбрәк горурлана. Укучыларның инновацион проектлары җиңүләре белән мәктәп алда бара. Шушы көннәрдә бер төркем укытучылар үзләренең укучылары белән «Перспектива» дип аталган инновацион проектларның өченче төбәкара конкурсы кысаларында яңа проектлар яклауга барачаклар. Гимназия - төрле дәрәҗәдәге фән олимпиадаларында катнашып, күп санлы җиңүчеләр биргән мәктәп. Ул яңа уку елына хәзерлек буенча да ел саен алда. Мәктәп-гимназиянең казанышлары бихисап. Боларның барысында да директорның хезмәте зур.
Юбилей көннәрендә Татьяна Николаевнаны кабинетында очрату кыен. Ул гел эш белән мәшгуль. Хәзергесе вакытта гимназиядә "Үтемле мохит" программасы буенча төзелеш эшләре бара, аның барышында мәктәпне төзекләндерү дәвам иттереләчәк. Татьяна Николаевна ниһаять гимназиядә актлар залы булдыру өчен көчен һәм вакытын кызганмый. Шушы программаны тормышка ашыру буенча эш гөрләп бара.
-Юбилеемны ничек каршылыйммы? Эш һәм тагын бер кат эш белән, теләсә кайсы мәктәп директорыныкы кебек үк, эшнең очы-кырые юк. Мәктәп - җанымның яртысы, дип әйтүем, чынлап та хактыр.
Татьяна Николаевна биргән интервьюсында да үзенә һәм җаваплы вазыйфасына тугры калды - җаны-тәне белән ул мәктәп проблемаларына чумган. "Планнары - зурдан кубып…" - бу аның хакында. Аларны тормышка ашыруда аңа уңышлар телибез.
Без Татьяна Николаевнаны юбилее белән котлап, ныклы сәламәтлек, күпкырлы педагогик хезмәтендә уңышлар телибез.
Ольга ИВАНОВА
Следите за самым важным и интересным в Telegram-каналеТатмедиа
Подписывайтесь на наш Telegram-канал "Шешминская новь"
Нет комментариев