Нина Паньшина: «Һөнәрем мине үзе тапты»

Хәзерге мәктәп китапханәсе уку эшчәнлеген мәгълүмати тәэмин итү коралы буларак кына түгел, ә тәрбия, уку-методик һәм мәгърифәтчелек функцияләрен тәэмин итүче бүлекчә буларак та эш итә.

Иҗади, артистларча оста, энергияле, җаваплы - Петропавел мәктәбе китапханәчесе Нина Александровна Паньшина турында укытучылар нәкъ менә шулай диләр.

Үз эшен ул икенче йорты, ә һөнәрен - үз эшем, дип атый һәм эшкә бик теләп йөри.  Бу мәктәпне 40 елдан артык элек Нина Александровна үзе дә тәмамлаган. Бераз укырга өйрәнгәннән соң, тәнәфесләрдә китапханәгә йөгерүен, китапларда әнисе укыган әкиятләрне эзләгәнен искә төшерә. Шул рәвешле китаплар укуга нык бирелеп китә. Югары сыйныфларда ук инде мәктәп программасы буенча әдәбиятны, романнарны укып чыга.  

Нина бу һөнәрне сайламый, китапханәче һөнәре аны үзе «таба»: мәктәп дирекциясе авыл клубының сәнгать җитәкчесен үзенә чакыра.  Һәм менә 37 ел дәвамында ул укучыларда китапларга мәхәббәт тәрбияли. 

«Безнең мәктәптә 56 укучы, дөресен генә әйткәндә, нәфис әдәбиятны һәркем укымый, әмма әдәби викториналарда, китап укучылар конкурсларында барысы да катнаша һәм чараларга әзерләнгәндә, әлбәттә, китапханәгә ярдәм сорап киләләр, - ди Нина Александровна. - Мондый хәл мине сөендерә генә: монда теләсә-теләмәсә дә, хәтта бер генә китап та укымый торган укучы, сорауларга җавап эзләп, китапка күз салачак».

«Башта, күп санлы китаплар һәм дәреслекләрдә ориентлашу авыр булды, китапханә каталогын тирәнтен өйрәнергә туры килде. Башка китапханәчеләр белән киңәшләштем, район семинарларына бардым, китапханә эшен мөстәкыйль өйрәндем», - ди Нина Александровна.  

Хәзер инде яшь белгечләр Нина Паньшинаның үзенә дә, тәҗрибәле һәм компетентлы профессионал буларак, ярдәм сорап мөрәҗәгать итәләр.