Пушкин көне алдыннан Шахмай музеенда «А. С. Пушкин һәм аның әкиятләре» дип исемләнгән чара узган

Бу хакта редакциягә «Мирхәйдәр Фәйзи исемендәге Шахмай авылы тарихы музее» филиалы мөдире Гөлүсә Баһутдинова яза.

-Һәр кешегә дә  А.С. Пушкин исеме яшьтән үк таныш, чөнки башта без аның  балалар өчен язган әкиятләре, аннары лирик әсәрләре, ә соңыннан романнары, повестьләре һәм пьесалары белән танышабыз.

Бөек рус шагыйре Александр Сергеевичның әдәби иҗаты зур кыйммәткә ия. Аның әсәрләре төрле яшьтәге, төрле диндәге, төрле милләттәге кешеләрне берләштерә, дөньяның дистәләгән телләренә тәрҗемә ителгән.

Пушкинның туган көне уңаеннан «Мирхәйдәр Фәйзи исемендәге Шахмай авылы тарихы музее» филиалында «Ромашка» балалар бакчасында тәрбияләнүче балалар өчен бөек шагыйрь белән танышу сәгате узды. Балалар А.С. Пушкинның тормыш һәм иҗат юлы, рус телен үстерүгә керткән өлеше турында белделәр. Ә ахырдан барысы да бергәләп А.С. Пушкинның «Балыкчы һәм балык турында әкият»ен тыңладылар.