Рамилә Халикова сәхнә белән балачактан таныш

Акъяр авылы мәдәният йортында Рамилә Халикова башта сәнгать җитәкчесе була, хәзер менә биш ел инде  мәдәният йортын җитәкли. 2019 елда капиталь ремонттан соң Акъяр АМЙ республиканың иң яхшы мәдәният йортларының берсе булды.

"Рамилә кечкенәдән сәхнәдә, аның әтисе - районның танылган баянчысы Рафыйк Хафиз улы Халиков аның аккомпаниаторы булды, - дип сөйли Акъяр авыл җирлеге башлыгы Данияр Гайнуллин. - Еллар үтте, Рамилә мәктәпне уңышлы тәмамлады, аннары Чистай педагогия училищесын тәмамлады. Биш ел Әлмәт шәһәренең балалар бакчасында тәрбияче булып эшли, Казан филология университеты дипломын алган. Һәм менә 7 ел инде безнең Акъяр авылының мәдәни эше белән җитәкчелек итә. Рамилә күп тапкырлар Яңа Чишмә районы һәм авыл җирлеге исеменнән Рәхмәт хатлары, Мактау грамоталары, Дипломнар белән бүләкләнде".

Авылдашлары Рамилә турында болай диләр: «Ул тамашачыларны сөендерергә ярата, һәрвакыт яңа рольләр, яңа җырлар уйлап таба, матур тематик кичәләр оештыра».

Рамилә Рафыйк кызы "Акъярым" вокаль коллективы һәм "Җырлы - моңлы балачак" балалар һәвәскәрләр берләшмәсе җитәкчесе.