Сугышчы Бек: «Мин патриотик рухта көрәшәм»

Вакыйгаларны үз күзләре белән күргән кеше, яшереп тормыйча, СВОда хезмәт итүе хакында сөйләде.

Операция булачак, кыйпылчыкны алачаклар

СВОда ул инде бер ел хезмәт итә (контрактны ике елга төзегән), 20 февральдә яраланган һәм хәзер дәвалануда. Аның җилкәсендә кыйпылчык бар. Рәшит госпитальдә дәваланган, июльдә аны 30 тәүлеккә дип өенә кайтарып җибәргәннәр. 10 көн элек Рәшит үзенең хәрби частена киткән. Анда табиблар катнашындагы медкомиссиядә операция ясау мәсьәләсе хәл ителгән. 

 Ул аларга: «Минем кулымны дәвалагыз һәм мин яңадан сафка басачакмын», - дигән.

Ул - руль артында

Рәшит мотопехота батальонының матди тәэмин итү взводында шофер булып хезмәт итә.  Шәхси составны, сугыш кирәк-яракларын, азык-төлекләрне алгы сызыкка ташый. Позывное кыска - Бек. «Радиоэлемтә өчен шулай яхшырак», - дип аңлата ул. Рейс вакытында яраланган - машина дроннан снаряд төшкәннән соң янып беткән. 

Бек төнлә, караңгыда гына машина белән йөри. Ул тәүлекнең нәкъ шушы вакытында гына әлеге юлдан йөрергә өйрәнгән.

- Әгәр миңа көндез шунда бар дисәләр, мин юлны таба алмаячакмын, - ди Рәшит. -Төнлә минем үз ориентирларым бар: кәкре нарат, янган БМП. Шәүләләре буенча гына абайлым, әлбәттә. Бервакыт батальон замполитын алып барган идем. Ул миннән шунда: «Нәрсә булса да күрәсеңме? , дип сорады. «Мин берни дә күрмим», ди. Мин аңа: «Мин дә күрмим, иптәш майор», дидем. Замполит: «Ә без ничек барабыз соң?», дип гаҗәпләнде. Шулай, ярты ел инде бу юлдан йөрим, күзләремне йомып барсам да, беләм мин аны. 

Янәшәдә барысы да үзебезнекеләр

Бек 37 нче полкта хезмәт итә, андагы кешеләрнең 90 проценттан артыгы-Татарстаннан, калганнары Кузбасс һәм Пензадан. Районнан якташлары да бар: Екатерина Бистәсеннән Александр (офицер), Яңа Чишмәдән Руслан һәм Андрей, Рәшит аларның икесе белән дә бер взводта.

- Безнең батальон Советлар Союзы Герое Сабир Әхтәмов исемен йөртә, - ди ул горурланып. - Безнең 37 нче полкны «татар полкы» дип атыйлар, чөнки 31 нче полк - башкортлар, 36 нчы полкта - Ульян өлкәсе кешеләре. Солдатларның мөнәсәбәтләре тугандаш, гәрчә барысы да төрле республикалардан һәм өлкәләрдән булсалар да.

Өзлексез тәэмин итү

Бек аларның туклануы яхшы, базада кыр кухнясы бар, ә алгы сызыкта сугышчылар коры паеклар, ярымфабрикатлар пешерә, консервылар да бар, ди.

- Безнең тәэмин итү взводы егетләре - боекомплект, азык-төлек таратучылар алгы сызыкта хезмәт итәләр. Взводның яртысы шунда, яртысы базада, - дип аңлата ул. -Без әйберләрне базадан алып аларга илтәбез, ә алар инде анда тараталар. Әмма хәзер боларның барысын да килеп ала торган урынга егетләр җәяү йөри. Ә бу кимендә 20 км юл үтүне күздә тота һәм турыдан түгел, ә әйләнеп килеп. Хохоллар безнең анда йөрүебезне сизделәр һәм безгә ау оештырдылар. Тагын биш машинаны дроннар белән яндырдылар.

Рәшит сөйләгәнчә, гуманитар ярдәм килеп тора, әмма ул адреслы булганда яхшырак. Кукмара районы яхшы тәэмин итә, батальонда шул районнан егетләр байтак, ди. Безнең район мобиль мунча алып барган иде. Ләкин Бек анда бара алмаган, яраланган булган.

Сугышта шаяртмыйча да ярамый

Рәшит холкы буенча сөйләшергә яратучан, шаян, оптимист кеше. Иптәшләре аңардан һәрвакыт: «Бек, берәр мәзәк сөйлә әле», - дип сорыйлар икән. Хәтере бик шәп, бик күп мәзәк белә, яңаларын ишетсә, шундук исендә калдыра. Шулай итеп ул хезмәттәшләренең кәефләрен күтәрә.

- Анда, шаяртып алмыйча булмый. Югыйсә психологик яктан авыр, сугыш бара бит, - ди Бек. - Кайчакта юмор да кирәк.

Яктылык һәм караңгылык

Элемтәнең ул тирән тылда гына яхшы булуын әйтте. Алгы кырыйда -Кременная, Северодонецкида ул юк. Азат ителгән Луганскида, Яңа Айдарда, Старобельскида элемтә һәм Интернет бар.

 -Беренче тапкыр анда командировкага барганда безнең өчен бу шундый гаҗәп булды... Күпкатлы йортларның тәрәзәләрендә ут бар, урам яктырткычлары да эшли. Ә алгы сызыктагы өйләрдә һәм урамнарда - дөм караңгы.

Рәшит позицияләрдә контактлы сугыш юк, дип сөйләде. Шулай булгач, сугышчылар дошманның йөзен күрми, дигән сүз.

 - Әгәр һөҗүм итә башлыйлар икән, әлбәттә, атабыз инде. Алар оборона окоплары ясап, артиллерия белән аталар, әмма, нигездә, дроннар җибәрәләр. Төп зыян шулардан килә.  Аларда ул БПЛАлар, кем әйтмешли, сарай артындагы тирестән дә күбрәк. Безнекеләр хәтта штурмга барганда да, хохолларга барып җитә алмыйлар, алар дроннар җибәрә, үзләренә якын килергә дә ирек бирми.

Туганнары да, хәрби  машинасы - «Урал»ы да көтә

Бәкне бүләкләүгә инде өч тапкыр тәкъдим язганнар, комбат үзе кул куйган. Әлегә кәгазьләр штабта ята. Рәшит сүзләренчә, анда баргач, бәлки, эш кузгалыр.  

 -Минем өчен бу мөһим түгел. Иң мөһиме - исән - сау әйләнеп кайту, - ди ул.

Бекның Шамил исемле улы бар, ул Казан энергетика университетының 2 курсын тәмамлаган. Әтисе белән языша, телефоннан сөйләшәләр. Хәзергесе вакытта улы студентлар төзелеш отряды белән Сочида. Шахмайда Рәшитне әнисе көтә. Икетуган апасы, РҮХ табибы Әлфия Юсупова да туганы белән элемтәдә тора.

16 июльдә Бәккә 48 яшь тулган. Аның машинасы төзек һәм базада «хуҗасын» көтеп тора икән.

- Яраланган чакта минеке түгел, икенче машина янды. Мин дәваланырмын һәм кире үземнең «Урал»ым руле артына утырырмын, безнең егетләр янына кайтырмын, дип өметләнәм. Мин бүген дә патриотик рухта көрәшергә әзер, ди Рәшит «Бек».

Фото асты: 2024 елның 15 февралендә Рәшит үзенең «Уралы» янында төшкән. Фото сугышчы архивыннан.