Тамара Малая: «Балаларым белән горурланам»

Махсус операциягә беренчеләрдән булып кече улы Михаил китә. Ул 2022 елның октябрендә өлешчә мобилизация буенча 35 яшендә чакырылган була. Армия хезмәтен эчке гаскәрләрдә үтә һәм аннары — өч ел контракт буенча Самара өлкәсендә. Махсус операциядә ул Краснолиманск юнәлешенең беренче оборона линиясендә — артиллериядә 9 кешедән торган бүлек белән командалык итә. Чакырылуга кадәр Михаил Әлмәттә яшәгән, нефть оешмасында җиһазлар ремонтлаучы булып эшләгән. Җитәкчеләре һәм хезмәттәшләре аның турында бары яхшы фикердә генә. Оешмада аңа даими рәвештә гуманитар ярдәм күрсәтәләр, аңа һәм хатынына да Әлмәттә ярдәм итәләр. Тамара Михайловна Халыкара хатын-кызлар көне алдыннан аның янына котларга килүләрен сөйләде. Улы Михаил да гуманитар ярдәм өчен районга бик рәхмәтле. Март башында ул ялга кайткан, 8 мартта хатыны белән әти-әнисендә кунакта була, аннары Әлмәткә китә. Аңа госпитальдән соң (умыртка баганасы җәрәхәтләнгәч) реабилитацияләнүгә 15 көн биргәннәр.

Михаил әти-әнисе белән. Әнисен 8 Март белән котлаган.

— Анда бит атышу гына түгел, авыр эшләр дә күп: окоплар казу, блиндажлар төзү, авыр әйберләр күтәрү һ.б. Умыртка сөягенә зыян килгәч, аның сул аягы йөрми башлый, бер ай Феодосиядә, аннары Грозныйда госпитальдә дәвалана. Хәзер барысы да җайланган, ялдан соң яңадан частька китәчәк.

Өлкән улы Владимир (Михаилдан өч яшькә олырак) узган елның җәендә 38 яшендә контракт буенча махсус операциягә китә. Владимир ветеринария институтын тәмамлый, армиягә чакырылмаган. СВОга кадәр Казанда төзелеш бизнесында, аннары Яңа Чишмәдә эшли.

— Вованы хәрби комиссариатка әңгәмәгә чакырдылар, — дип сөйли Тамара Михайловна. — Һәм ул контракт төзергә ризалык бирә. Мин аны үгетләп карадым, еладым, ә ул: «Әни, без булмасак, кем? Әгәр дә алар безгә килсәләр...?», — диде. Петров көнендә, авыл бәйрәмендә, без аны озаттык. Хәзер ул танкта заряд куючы.

 Владимир.

Тамара Михайловна ире белән, биш баласыннан тыш (икесе үлгән: бер улы 20 ел элек, икенчесе — Сергей — гыйнварда), туганының балаларын тәрбияләп үстерә (Артем һәм Валентинаны). Алар әти-әнисез калганда Валяга 7 яшь, Артем 6 нчы сыйныфта укый торган була. Артем 118 нче Һөнәр училищесында эретеп ябыштыручыга укый, белгечлеге буенча эшли, "Сәмум"да хезмәт иткән.

Ул Владимирдан соң 4 ай үткәч контракт буенча СВОга китә. Луганск янында хезмәт итә. Китәренә бер көн алда, биш ел бергә яшәгән хатыны белән язылыша. Валентина да кияүдә, аның ике кызы бар, ире Михаил белән Кама Аланында яшиләр. Кияве СВОга үз теләге белән киткән, махсус операциядә ул разведкада. Инде ике тапкыр ялга кайткан.

Улы һәм кияве контракт буенча Самара өлкәсендә хезмәт иткәннәр, яхшы хезмәт иткән өчен бүләкләре дә бар.

— Сүриядә конфликт башлангач, улым шунда ашкынды, — дип сөйли Тамара Михайловна. -Әмма аларның частен анда күчермәгәннәр. Икесе дә "гражданка"га кайткач, безгә хәрби хезмәт ошый, диделәр.

Кияве Михаил һәм Артем СВОда бер — берсеннән ерак түгел икән, аралары 40-50 чакрымда гына, алар бик еш очрашалар.

Кияве Михаил (уңда) һәм Артем. 

Зур гаиләдән дүрт кеше махсус хәрби операциядә. Туганнары һәм әниләре белән видеоэлемтә аша даими сөйләшеп-аралашып торалар. Балалары хәтта Тамара Михайловнага аның иске төймәле телефоны урынына, бер-берсен якыннан күреп, меңнәрчә километр аралыкта булуларына карамастан, сөйләшеп булсын өчен заманчасын — смартфон сатып алганнар.

-Бер-беребезне күрәбез, сөйләшәбез. Күңел тынычлана. Рәхәт булып китә. Миша улымның "Телеграм«ы эшли, Вовада, Артемда, киявемдә — ватсап. Даими рәвештә язышабыз. Барысы өчен дә борчылам инде. Һәм, әлбәттә, барлык балаларым белән горурланам, — ди Тамара Михайловна.

Валентинаның балалары әтиләрен һәм абыйларын (алар һәрвакыт әбисе һәм бабасы янында) тизрәк өйгә кайтуларын көтәләр.

— Алар гел бездә, дип әйтсәң дә була инде. Дашенька 4 сыйныфта укый, Ксюшага 6 яшь. Кызым Светлананың инде өйләнгән өч оныгы һәм бер яшьлек оныкчыгы бар. Еш кына бездә кунакта булалар. Без бит бабам белән пенсиядә. Балаларның килүе безгә шатлык кына.

Тамара Михайловна һәм Михаил Федорович 42 ел бергә гомер итәләр. Ул 23 ел туган авылында терлекчелектә эшләгән, «Хезмәт ветераны» исеменә лаек, намуслы хезмәте өчен байтак грамоталар ала. Күптән түгел халык җыенында Тамара Михайловнага күпьеллык нәтиҗәле хезмәте һәм республиканың агросәнәгать комплексына зур өлеш керткәне өчен ТР Авыл хуҗалыгы һәм азык-төлек министрлыгының Рәхмәт хаты тапшырылган. Михаил Федорович та күп еллар колхозда механизатор булып эшләгән.

— Балаларыбыз, барысы да җитәрлек, бернәрсәгә дә ихтыяҗ юк, «гуманитарка» да күп, — диләр. Волонтер Александр Карпов еш килә һәм барысын да китерә. Херсон өлкәсендә Миша белән безнең районнан башка егетләр дә бар, диләр. Улларыма инде берничә тапкыр посылкалар җибәрдем. Район халкына анда барулары, барысын да алып килүләре өчен зур рәхмәт. Миша волонтерларга һәм район хакимиятенә ярдәм оештырганнары өчен зур рәхмәт әйтә. Безне, әниләрне дә, онытмыйлар. 8 мартка мине хакимияттән котларга килделәр, чәчәк бәйләме бүләк иттеләр. Мин балаларым белән горурланам.