Волчья Бистәсе: динне торгызу юлында

Бистә халкы юбилейны бәйрәм итүне Косма һәм Дамиан хөрмәтенә булган дини бәйрәмгә тикмәгә генә туры китермәгән: бу изгеләр авылның символикасына әверелгән, ул исә динне торгызу юлыннан бара.

Косма һәм Дамиан хөрмәтенә төзелгән Волчья чиркәвендә иртән гыйбадәт кылынды, аны Чистай һәм Түбән Кама епархиясе архиерие епископ Пармен Яңа Чишмә һәм күрше районнар поплары белән берлектә үткәрде.

Бәйрәмнең дөньяви өлеше авыл мәдәният йортында үтте, анда кунакларны Архангел, Чуаш Чабаксары, Яңа Иванаево, Яңа Чишмә, Черемухово, Ленино мәдәният йортлары артистлары сәламләде, МЙ фойесында музей экспонатларыннан күргәзмә оештырылган иде, ә залда Николай Темниковның "Слобода Волчья на пути возрождения духовности" фильмы тәкъдир ителде. Фильм кунакларга быел февраль аенда ишекләрен ачкан чиркәү төзелеше турында сөйләде.

Вячеслав Козлов, Вячеслав Улитин һәм епископ Пармен бәйрәм белән котлап чыгыш ясадылар.

Авыл җирлеге башлыгы Иван Улитин авылның 250 еллыгы хөрмәтенә үзләренең эшләре белән танылган авылдашларының исемнәрен атап үтте. Араларында Вячеслав Улитин - чиркәү төзелеше һәм Волчья урта мәктәбенең даими иганәчесе; 8 яшьтән алып озак еллар колхоз фермасында эшләгән Мария Филипповна Агафонова; авылның җәмәгать эшләрендә актив катнашучы, авыл мәктәбе укытучысы Татьяна Минаева һәм авыл хуҗалыгы хезмәте династиясе вәкиле Николай Минаев бар. Аларны авыл халкы хөрмәт итә һәм бик рәхмәтле, Рәхмәт хатлары, истәлекле бүләкләр белән бүләкләделәр, алкышларга күмделәр. Бәйрәм күмәк табын артында сыйлану белән дәвам итте.

Лариса ФЕДОРОВА