Яңа Чишмә район медикларын хөрмәтли

Балалар бакчасының шәфкать туташы кем ул? Барыннан да элек, бу педиатриядә югары класслы белгеч. Ул балаларны яратучы, теләсә кайсы мизгелдә ярдәмгә килергә сәләтле кеше. Бу - безнең дәүләтнең киләчәге өчен сәламәт буын үстерү миссиясен алып баручы шәхес.
"Яңа Чишмәдәге «Ландыш» балалар бакчасының шәфкать туташы Холина Наталья Ивановна нәкъ менә шушы сыйфатларга ия. Аның көндәлек эшенә түбәндәгеләр керә: балаларның туклану рационының баланслылыгын һәм оптималь оештыруны күзәтү; Яңа Чишмә балалар поликлиникасы белән хезмәттәшлек итеп, прививкалар ясау чараларын планлаштыру һәм вакытында үткәрү; төркемнәрдә һәм, гомумән, балалар бакчасында санитар нормаларның үтәлешен күзәтү", - дип сөйли балалар бакчасы мөдире Наталья Ведякина.
Аның 40 елдан артык эш тәҗрибәсе балаларны тикшерүнең төрле ысулларын кулланырга, авыруларны ачыклау, һәр балага якын килү юлы белән беренче ярдәм күрсәтә белергә мөмкинлек бирә. Мәктәпкәчә яшьтәге һәр бала Наташа апасының кабинетын бик тиз таба һәм аның янына «витамин» сорап керә.
Үз эшендә ул инновацион методлар куллана. «Сәламәтлек төркеме» җитәкчесе белән бергә Наталья Ивановна чыныктыргыч чаралар буенча еш авыручы балалар белән эшләү, профилактик процедуралар (аромотерапия, фитотерапия) буенча программа эшләүдә катнаша. Теләсә кайсы вакытта ул ата-аналарга ярдәмгә килә, авыру баланы карау планында да киңәшләр бирә, шулай ук өйдә сәламәтләндерү чараларын уздыру мәсьәләләрендә дә ярдәм итә.
2010 елда Наталья Ивановна ТР Сәламәтлек саклау министрлыгының Мактау грамотасы белән бүләкләнде.
Холина Наталья Ивановнаның хезмәт кенәгәсендә хезмәт эшчәнлеге турында нибары ике генә язу бар, бу - Яңа Чишмә РҮХ һәм «Ландыш» балалар бакчасы. Ике сан һәм төрле вакыйгаларга һәм кичерешләргә бай гомер. Наталья Ивановна балалар инфекциясенең мәкерлелеге турында яхшы белә, прививкадан соң баланың кинәт кенә температурасы булса яки аның аппетиты булмаса, алар өчен борчыла.
Кырык ел дәвамында аңа ире Сергей Николаевич һәрчак терәк булып торган һәм тора. Әти-әнисе балачактан ук хезмәт сөючәнлек, җаваплылык, игелеклелек хисләре тәрбияләгән ике улы әти-әнисен даими ярдәм белән генә түгел, ә оныклары (алар әлегә Холиннар гаиләсендә бишәү) белән дә сөендерә. Әмма Наталья Ивановнаның быелгы юбилей елында алтынчы оныгы туу көтелә.
Тату, тыйнак гаиләдә тәрбияләнгән Наталья Ивановна эшне беркайчан да күрсәтер өчен генә эшләми. Күпме балага прививка ясавы, озак еллар дәвамында үз хезмәте өчен күпме игелекле сүзләр ишетүе турында уйламыйча, ул фәкать тыныч кына көндәлек эше белән шөгыльләнә.