Яңа Чишмә районы "Агро-Основа" ҖЧҖ игенчеләре бөртекле культуралар урып-җыюны төгәлли

- Безнең хуҗалыкта бөртекле культуралар 10 мең гектардан артык мәйдан били, - дип билгеләп үтте безнең белән сөйләшү барышында ширкәт җитәкчесе Илдар Гарифуллин. - Урып-җыюда 17 комбайн эшли, шул исәптән 6 «Лексион», 2 – «Акрос-530», 6 – СК-5 «Нива» һәм 3 «Палессе» комбайны.

9 сентябрьгә барлык көзге культуралар, борчак, солы, арпа һәм рапс мәйданнарының яртысы (барлыгы 1400 гектар) җыеп алынган. 1000 гектарга якын сабан бодае җыясы калган. Агымдагы елда уңыш начар түгел – гектарыннан 30 центнерга якын, бу көнгә 20 мең тоннадан артык ашлык суктырылган.

Шулардан 4,5 мең тоннага якын орлык материалы беренчел эшкәртүдән соң салынган, 7 мең тоннадан артык арыш һәм бодай тоннасы 9-10 мең сумнан сатылган. Фураж өчен дә яхшы запас салына.

- Бездә ике катнаш азык заводы бар һәм маллар өчен катнаш азыкны үзебез ясаячакбыз, - ди Илдар Гарифуллин.

Иң яхшы комбайнчылар арасында ул Владимир Нестеровны (2100 тонна суктырган), Гаил Хәлиуллин (1300 тонна), бертуган Ришат һәм Рафаэль Хәмзиннар (650-750 тонна) исемнәрен атады. Яшь комбайнчылар Айнур Җамалетдинов, Марсель Мөхәммәтҗанов, Айнур Таҗетдинов, Булат Вафинның да күрсәткечләре начар түгел. Ашлык ташуда шоферлар Минәгъзам Шәмсуаров (14,5 мең тонна), Линар Ганиев (12,5 мең тонна), Сергей Селифонов (13,8 мең тонна), Ильяс Әхмәтҗанов (12,7 мең тонна) һәм башкалар яхшы эшлиләр.

Абыйлы-энеле Ришат һәм Рафаэль Хәмзиннарны без «Нива» бункерларыннан ашлык бушатканда очраттык. Ике механизаторның да стажы 30шар ел, ә бу комбайннар штурвалы артында алар 16 нчы сезон эшлиләр.

- Комбайннарыбызны яттан беләбез, алар да безне сынатмый, - диләр. - Ватылулар була, әлбәттә, әмма аларны тиз арада бетерәбез. Запчастьләр белән проблема юк.

Чыннан да, 15 еллык «Нива»га 700-750шәр тонна суктыру - бу инде яхшы нәтиҗә, урып-җыю азагына кадәр бу күрсәткеч 1000 тоннага җитәчәк.

Урып-җыю белән беррәттән көзге культураларны чәчү дә төгәлләнеп килә. 5000 гектарда чәчү планлаштырыла, тәҗрибәле механизаторлар Николай Чукашов һәм Александр Феоктистов тарафыннан 4000 гектарда чәчелгән инде, алар чәчү комплекслары булган яңа К-742 тракторлары белән идарә итә.

Барлык механизаторларның да кәефе яхшы һәм шушы көннәрдә урып-җыю эшләре тәмамланыр дип өметләнәбез.

Бертуган Ришат һәм Рафаэль Хәмзиннар. Автор фотосы.