Яңа Чишмә хәбәрләре
  • Рус Тат
  • Яңа Чишмә районының мәктәпкәчә белем бирү нәтиҗәләре һәм перспективалары

    Яңа Чишмә районының мәктәпкәчә белем бирү системасында 3 башлангыч мәктәп - балалар бакчасы, 19 балалар бакчасы эшли

    Мәгариф бүлеге җитәкчесе Александр Еронтьев узган уку елында мәктәпкәчә белем бирү нәтиҗәләре турында сөйләде:

    - 2019-2020 елларда балалар бакчаларына 596 бала (60,3%) йөргән, чират белән проблема юк. Мәктәпкәчә белем бирү учреждениеләрендә 201 кеше эшли, шул исәптән 63 педагог, шуларның 7сеюгары һәм 37се-беренче квалификация категориясенә ия.

    Соңгы елларда Татарстан мәгариф системасына Мәгарифне үстерү стратегиясен һәм федераль программаларны гамәлгә ашыру кысаларында җитди инвестицияләр кертелде. Бу - мәктәпкәчә белем бирү учреждениеләрен мәгълүматлаштыру, капиталь ремонт программасын тормышка ашыру, интерактив җиһазлар сатып алу, педагогик кадрларның һөнәри үсеш юлын яңарту.

    Хәзерге вакытта районның 19 мәктәпкәчә белем бирү учреждениесе Интернет челтәренә тоташтырылган, һәр төркемгә берәр компьютер алынган.

    Гомуми белем бирү учреждениеләрен капиталь ремонтлау республика программасы буенча районның 9 мәктәбе ремонтланды, шул исәптән быел 16 млн. сумга - «Ландыш» балалар бакчасы.

    Мәктәпкәчә белем бирү учреждениесенең төп бурычларының берсе - балаларның физик һәм психик сәламәтлеген ныгыту: балаларны сәламәтләндерү һәм авыруларны профилактикалау буенча чаралар, туклану культурасы һәм гигиена буенча әңгәмәләр һәм практик дәресләр үткәрелә.

    Районда мәктәпкәчә яшьтәге 8 инвалид бала яши, шуларның 4се балалар бакчасына йөри. Район үзәгендәге «Ландыш», «Крепыш» һәм «Алтын ачкыч» балалар бакчаларында сөйләм үсешендә тайпылышлары булган 65 бала белән укыту - корректура эшләре алып барыла. «Ландыш» балалар бакчасында тәрбияләнүче 13 балага логопедия буенча өстәмә хезмәт күрсәтелә.

    МӘКТӘПКӘЧӘ БЕЛЕМ БИРҮНЕҢ ЯҢА СТАНДАРТЛАРЫ

    Узган уку елында барлык мәктәпкәчә белем бирү учреждениеләрендә мәктәпкәчә белем бирүнең федераль дәүләт белем бирү стандартларын гамәлгә кертү буенча (ФГОС ДО) эш дәвам ителде: белем бирү программалары эшләнде, педагоглар квалификацияләрен күтәрү буенча укулар узды.

    2013 елдан билингваль белем бирү буенча эш алып барыла. 2018 елда «Алтын ачкыч» балалар бакчасы «Иң яхшы билингваль балалар бакчасы» республика конкурсында җиңүче булды. 2020 елда «Иң яхшы билингваль балалар бакчасы» грант бәйгесендә Зирекле балалар бакчасы катнашты.

    Балалар бакчаларында балаларны туган телләргә өйрәтү буенча инновацион технологияләр кертү өчен база мәйданчыклары булдырылды: «Ландыш» балалар бакчасында балаларны рус һәм татар телләренә өйрәтү, Тубылгытау балалар бакчасында татар телендә белем һәм тәрбия бирүне үстерү һәм район үзәгендәге «Алтын ачкыч» балалар бакчасында ФГОС кертү буенча ресурс үзәкләре. Ел дәвамында мәйданчыкларда семинарлар, мастер-класслар оештырыла, педагоглар укырга җибәрелә. 2019 елда 25 тәрбияче «Ландыш» балалар бакчасы базасында оештырылган «ФГОС ДО» кысаларында «Билингваль белем бирү» курслары узды.

    ГРАНТЛАР

    Ел саен мәктәпкәчә белем бирү учреждениеләре «РИТЭК» ААҖнең социаль һәм мәдәни проектлары конкурсында төрле номинацияләрдә грантлар ала. Мәсәлән, соңгы 3 елда Тубылгытау балалар бакчасы - 50000 сум (спорт мәйданчыгы җиһазландырылган),Черемухово балалар бакчасы - 200000 сум (уен һәм спорт комплекслары сатып алынган), Әдәмсә балалар бакчасы - 70000 сум (уен мәйданчыгы җиһазландырылган) грант алды. Архангел балалар бакчасы «ЭКОяз» республика конкурсының муниципаль этабында «ЭКОяз – балалар бакчасы» номинациясендә җиңгән өчен сертификат белән бүләкләнде.

    КОНКУРСЛАР

    Күп кенә педагоглар һәм мәктәпкәчә белем бирү учреждениеләре коллективлары бөтенроссия, республика һәм муниципаль  конкурсларда катнаша, бу - «Татарстан Республикасының ел тәрбиячесе - 2020» конкурсы, «Чемоданда музей» проекты, рус телле тәрбиячеләр арасында «Мин татарча сөйләшәм һәм эшлим», «Иң яхшы мастер-класс» төбәкара конкурсы, юлларда куркынычсызлык кагыйдәләренә өйрәтү буенча «Куркынычсызлык шкатулкасы» республика смотр - конкурсы һ. б.

    Ел саен мәктәпкәчә белем бирү педагоглары мәктәпкә әзерлек төркемендә тәрбияләнүчеләрне тикшерә. 2020 елда 121 бала тикшерелгән.

    Узган уку елында сәләтле балалар белән эшләү программасын гамәлгә ашыру дәвам итте,  ул алар белән  мәктәпкәчә яшьтән үк эшли башлар өчен, сәләтне кече яшьтән ачыкларга ярдәм итә. Бу - «Көзге марафон», Г. Тукай исемендәге шигырь укучылар конкурсы, өлкәнрәк мәктәпкәчә яшьтәге балалар арасында «Дөньяны үзебез таныйбыз» дигән тикшеренү эшләре һәм проектлар конкурсы, балалар һәм яшүсмерләр театрлары фестивале.

    «Светлячок» һәм «Галим сабый» дип аталган мәктәпкәчә яшьтәге балалар өчен республика олимпиадаларында 49 бала катнашты, шуларның 34е җиңүче булды. Яңа Чишмә башлангыч мәктәбе - балалар бакчасы тәрбияләнүчеләре командасы республика интеллектуаль олимпиада призеры булды.

    2021 елга мәктәпкәчә белем бирү өлкәсендә бурычлар: кадрлар сәясәте буенча эшне дәвам итү, матди-техник һәм фәнни-методик базаларны яңарту, сәламәтлекне саклаучы белем бирү мохитен, шулай ук талантлы һәм сәләтле балалар белән эшләү системасын формалаштыру.

    Рәсемдә: Яңа Чишмәдәге «Ландыш» балалар бакчасында дәрес бара.

     

     

    Иң мөһим һәм кызыклы язмаларны Татмедиа Telegram-каналында укыгыз


    Нравится
    Поделиться:
    Реклама
    Комментарии (0)
    Осталось символов: