Яңа Чишмәнең «Родничок» ансамбле - дәүләт стипендиясе лауреаты

13 апрельдә ТР Министрлар Кабинетында «Созвездие-Йолдызлык» эстрада сәнгатенең ел саен үткәрелә торган ачык республика телевизион яшьләр фестивале лауреатларына дәүләт стипендияләрен тапшыру тантанасы булып узган. Премияләрне ТР Премьер-министры урынбасары Ләйлә Фазлыева тапшырган.

Барлыгы 40 стипендия тапшырылган. Гомуми фонд 2 млн. 150 мең сум тәшкил иткән. Стипендиатлар исемлегенә узган ел «Созвездие-Йолдызлык» фестиваль хәрәкәтендә катнашкан  Татарстанның иҗат коллективлары һәм аерым башкаручылар кергән.

 Бүләкләр тапшыру 2021 ел фестиваленең беренче суперфиналы алдыннан узган, ул исә 17 апрельдә «Уникс» мәдәни-спорт комплексында узачак.

Covid-19 инфекциясе таралу куркынычы белән бәйле рәвештә, фестивальнең зона этапларында җиңүчеләрнең чыгышлары тамашачылар катнашыннан башка узачак.

Гала-концерт 22 апрельдә шулай ук «Уникс» сәхнәсендә булып узачак, ә катнашучыларның чыгышлары форумның финал аккорды булып 6 майда «Пирамида» мәдәни-күңел ачу комплексы сәхнәсендә үтәчәк. Нәкъ менә шунда проектта җиңүчеләр һәм Гран-при ияләре, шулай ук мактаулы исемнәргә, дәүләт бүләкләренә һәм «Татнефть» компаниясе премияләренә ия булучылар игълан ителәчәк.

Балаларны һәм җитәкчеләре Любовь Мазманянны котлыйбыз, киләчәктә дә иҗади уңышлар һәм җиңүләр телибез.