Яңа Чишмәдә “Нечкәбил“

Әңгәмәдә 10 хатын-кыз: Аксубай, Нурлат, Чирмешән, Әлмәт, Лениногорск, Азнакай, Ютазы, Бөгелмә, Баулы һәм Яңа Чишмә районнарыннан вәкилләр катнашты. Моңарчы 15 июньдә Лаешта беренче тур узган иде, өченчесе - "Нечкәбил", ул балалы хатыннар өчен ачык конкурс, һәм анда алар бөтен гаиләләре белән: балалары, ирләре, әти-әниләре, туганнары, дуслары белән катнаша алалар. Һәм, әлбәттә, конкурсның төп героинясы - бу аналар, гаилә учагын саклаучылар, яраткан һәм яратылган хатын-кызлар. Татарстан Президенты Рөстәм Миңнеханов ярдәме белән 10 ел рәттән уздырылучы "Нечкәбил" конкурсында, аның ярымфиналларында 450 нык һәм бәхетле гаилә һәм 150 ләп уңышлы хатын-кыз, яраткан әниләр, хатыннар һәм кызлар үз гаиләләре данын якладылар.

19 июньдә сайлап алу турын үткәрү өчен Яңа Чишмәгә иҗади һөнәр ияләре (сценарий язучылар, режиссерлар һ.б.) - конкурс җитәкчесе Изольда Жуйкова җитәкчелегендә сайлап алу комиссиясе әгъзалары җыелды. Сайлап алу туры конкурста катнашучылар белән әңгәмә һәм анкеталарга анализ ясау формасында үтте.

Катнашучылар белән танышу барышында конкурс шартлары хакында фикер алыштылар, гаилә белән чыгыш ясау темалары, "Гаилә кыйммәтләре", "Халык традицияләре", "Гаилә тарихлары", "Һөнәри бәйрәм", "Буыннар бәйләнеше", "Балачак иле" кебек конкурс мәйданчыкларында катнашучылар билгеләнде. Конкурсантлар конкурс турында күзалласын өчен "Нечкәбил" конкурсыннан (алдагы еллардагы) кайбер чыгышлардан торган видеоролик күрсәтелде, алар белән ничек эшләячәкләр, чыгышларга кем әзерләячәк һәм алардан ниләр таләп ителүе турында сөйләнде. Катнашучылар белән үткәрелгән әңгәмәләрдә жюри берьюлы карашлар киңлеген, социаль активлыкны, максатчанлыкны, характер, ихтирамлылык, мөлаемлылык кебек сыйфатларны, конкурста катнашучыларның һәм гаилә әгъзаларының әзерлекләрен бәяләде. Чөнки конкурста катнашучыларның кайберләре, өстәвенә гаиләләре белән бергә, профессиональ сәхнәдә сирәк катнаша - бу бик катлаулы һәм җаваплы. Сценарий авторлары, режиссерлар, профессиональ коллективлар гаилә номерлары оештыруда аларга ярдәм итәләр. Финал чыгышы исә иҗади төркемнең, дирекциянең, конкурсантларның һәм гаиләләрнең зур күләмле бердәм эше ул.

Зона турлары конкурсантлары 6 сентябрьдә "Нечкәбил-2015" Татарстан гаиләләре фестивалендә (ярымфинал) катнашачаклар. Конкурс финалы 28 ноябрьдә Әниләр көнендә Казанда "Пирамида"да булачак. Яңа Чишмә районыннан район халкының яраткан башкаручысы, иҗади шәхес Ләйсән Шәйхетдинова катнашачак. Аңа уңышлар телибез!