Атом фаҗигасе нәтиҗәләрен бетерүче

Аның нәтиҗәләрен бетерүдә катнашкан авылдашы турында безгә Чаллы Башы мәдәният йорты директоры Илсөяр Дәүләтшина яза.

«Энергоблокта шартлау була, ул реакторны тулысынча җимерә, янгын башлана.

Авария нәтиҗәсендә әйләнә-тирә мохиткә агулы радиоактив матдәләр чыга. СССРның 140 мең кв.км территориясе пычрана, анда 7 миллионга якын кеше яши.

Фаҗигале нәтиҗәләрне бетерү өчен шактый ресурслар туплана, 500 меңнән артык кеше һәлакәтне бетерүдә катнаша.

Әлеге фидакарь эшкә Чаллы Башы авылыннан Җамалиев Нургали Заһретдин улы да үз өлешен кертә. Ул үз теләге белән гариза яза һәм Чернобыльгә китә. Армиядә пешекче булып эшләгәнгә күрә, аны биредә дә шул вазыйфага эшкә алалар.

«Көненә 3 смена эшләдек, сменага 200 кешене ашаттык», - дип искә ала Нургали абый. - Тирә-яктагы авылларны бульдозерлар белән тигезләделәр, башта кара туфрак түшәделәр, өстенә бетон салдылар. Күпләр үпкә туберкулезы белән авырады, исән калганнарны өйләренә кайтарып җибәрделәр. Кайтканда, мин чәчләрем агарган иде инде, ә бергә эшләгән иптәшләремнең күбесе исән калмады», - дип көрсенә ул.

Безнең бу Чернобыль хатирәләре – 39 ел элек булган һәлакәтне искә төшерү омтылышы гына түгел, бәлки бу коточкыч бәла-казаны үз җилкәләрендә күтәреп чыккан кешеләр алдында баш ияргә теләк тә...»

Рәсемдә: Илсөяр Дәүләтшина Нургали абый белән сөйләшә.