Азык әзерләү эшләре бара

Үткән елгы кышлату, азык запасы яхшы булганда, аларны ашатуда бернинди проблемалар килеп чыкмавын күрсәткән, күпчелек хуҗалыкларда хәзергесе вакытта да азык запасы шактый зур.
Кызганычка каршы, быелгы корылыкта, азык культураларының уңышы мул булырга өмет аз. Шуңа да карамастан, 1 шартлы баш терлеккә кимендә 40 центнер азык берәмлеге әзерләү бурычы куела, ә бу ел ярымлык азык запасын тәшкил итә.
— Безгә 7 мең тонна печән, 70 мең тонна сенаж һәм 80 мең тонна силос, шулай ук 10 мең тонна бөртек фуражы һәм терлек астына салыр өчен 5 мең тонна салам әзерләргә кирәк, — ди район авыл хуҗалыгы идарәсе начальнигы Леонид Богомолов. — «Закрома», «Игенче» ҖЧҖ һәм «Козлова М. И.» КФХларында сенаж салуга инде керештеләр. Печән әзерләү белән барлык хуҗалыклар да шөгыльләнә. 20 июньгә 3000 тоннага якын сенаж салынган һәм 800 тоннага якын печән әзерләнгән. 
Хуҗалык җитәкчеләренә һәм белгечләргә сыйфатлы, югары туклыклы азык әзерләү максатыннан консервантлар кушылган сенаж салу технологиясен үтәүгә аерым игътибар бирергә кирәк.
... «Закрома» ҖЧҖдә дә салынган сенажның сыйфатына аерым игътибар бирелә — анда салам да, консервантлар да өстәлә.
— Безнең хуҗалыкта күпьеллык үләннәр 1100 гектар мәйданны били, шуларның 800 гектары сенажга, ә 300е печәнгә китәчәк, — ди «Закрома» ҖЧҖ директоры урынбасары Илдар Хәбибуллин. — 20 июньгә печәнгә дип 70 гектар һәм сенажга — 150 гектар мәйдан эшкәртелгән (100 гектар инде җыелган).
Безнең 1400 баш МЭТ бар (шул исәптән 600 савым сыеры да). Сенажга сыйдырышлылыгы 3000 тонна булган ике чокыр, шулай ук 5 мең тонна силос әзерләргә кирәк. Узган елгы запаслардан 3 мең тонна силос, 2 мең тонна сенаж һәм 200 тонна печән калды.

Бүгенгесе көндә сенаж салу белән Дон — 680 азык җыю комбайнында Сергей Насейкин мәшгуль. Ташу эшләренә Сергей Горбунов һәм Александр Жестков идарәсендәге ике МАЗ машинасы һәм Алексей Андриевский идарә иткән бер МТЗ-1221 тракторы җәлеп ителгән. Басу еракта булуга карамастан, алар өлгерә, чөнки масса бик күп түгел (ягъни комбайннар эшсез тормый, диярлек). 
Печән чабуда яшь комбайнчы Артем Строгонов хезмәт куя, ул инде өченче сезон КСУ комбайнында эшли һәм үз эшен бик оста башкара. Аның белән бергә «Магдоне» комбайнында тәҗрибәле Михаил Данилов та эшли.

Яшь комбайнчы Артем Строгонов. Фото: Азат Мусин.

— Икенче азык җыю комбайны әлегә ремонтта, әмма инде шушы көннәрдә чыгачак һәм сенаж салу эшләре тизрәк барачак, — ди Илдар Фәргать улы. — Массаны ташу өчен дә техника бар.
Безнең белән сөйләшкәндә механизаторлар яңгырлар булмавына зарландылар, үләннәрнең икенче катын көтәргә кирәкме-юкмы икәнлеген үзегез уйлагыз. Тулаем алганда, алар эшкә әзер, хезмәт хакына зарланмыйлар (аена ике тапкыр яхшы түләү алалар) һәм кыска вакыт эчендә беренче сенаж чокырын тутырырга ниятлиләр.