Быел 1 сентябрьдә Яңа Чишмә укучылары сафын 141 беренче сыйныф укучысы тулыландырды

«141 беренче сыйныф укучысы мәктәп бусагасыннан беренче тапкыр атлап керде. Әлеге балалар өчен мәктәптә укуның беренче елы зур әһәмияткә ия: баланың киләчәктә ничек укуы аңа бәйле. 
1 сентябрь алдыннан Яңа Чишмә мәгариф бүлеге начальнигы Анна Бутина мәгариф эшчәнлегенә кагылышы булган барлык кешеләрне (шулай ук ата-аналарны, әби-бабайларны) яңа уку елы белән котлады:
«Киләсе уку елының вакыйгаларга бай һәм уңышлы булуын телим. Эштәге мөһим эшләрне, өйдәге мәшәкатьләрне һәм балалар белән вакыт уздыруны берләштерү җиңеллек белән үтсен. Балалары мәктәпкә укырга кергән ата-аналар үзләре дә икенче кат белем ала диләр. Шуңа күрә барыгызга да уку процессының җиңел булуын, яңа белемнәр, югары билгеләр һәм һәрвакыт яхшы кәеф телим».

Чыннан да, бу шулай.  Беренче сыйныф - балалар һәм ата-аналар өчен зур сынау. Шуңа күрә дә баланың мәктәптә узган беренче көне зур әһәмияткә ия.
Һәм менә Яңа Чишмә башлангыч мәктәбендә дә уку елы башланды, анда 44 беренче сыйныф укучысы килгән. Биредә аларны мәктәпкә бар күңелен биреп эшләүче укытучылар каршы алды, бу: Флүзә Рәхимова (1 квалификацион категорияле укытучы); Гүзәлия Нурхамәтова (югары квалификацион категорияле укытучы) һәм 1 квалификацион категориясе булган укытучы - Наталья Сударкина.

Бәйрәм мәйданчыгында җыелучыларны сәламләп, аның директоры Ирина Лихачева чыгыш ясады, ул әлеге белем бирү учреждениесендә 144 мәктәп укучысы һәм балалар бакчасында тәрбияләнүче 30 бала барлыгын билгеләп үтте. 
«Һәр бала табигатьтән уникаль, һәркем танып белүгә омтыла, укучылар иҗат белән мавыгалар һәм мәктәп тормышында актив катнашып, үзләренең күпкырлы талантларын үстерәләр. 

 Беренче сыйныф укучылары өчен укуда, спортта һәм башка уку - танып белү өлкәләрендә уңышка ирешкән мәктәп укучылары тырышлык һәм активлык үрнәге булып торачаклар. Биредә андыйлар күп, чөнки узган уку елы нәтиҗәләре буенча ул районның башлангыч мәктәпләре арасында беренче урында тора. Мондагы педагоглар коллективы мәктәп яны территориясендә чәчәкләр үстереп кенә калмый, мәктәпнең үзендә дә балаларның сәләтләрен үстерә, игелеклелеккә һәм гаделлеккә өйрәтә». 
Ирина Лихачева балаларны тәрбияләүгә өлеш кертүчеләргә һәм ата-аналарга рәхмәт сүзләрен җиткерде.
Укучыларны һәм аларның педагогларын сәламләп, котлау сүзләре белән район хакимияте вәкиле Лилия Хираҗева чыгыш ясады.
Беренче сыйныф укучыларының әти-әниләре дә балаларга яхшы укуларын теләделәр.
Ә беренче сыйныф укучылары исә, түземсезлек белән укытучыларына үзләренең зур чәчәк бәйләмнәрен бүләк итүне көттеләр. Һәм менә шушы минут килеп тә җитте: 44 бала «беренче сыйныф укучысы» статусын алды һәм, ниһаять, мәктәп укытучыларына һәм мөхтәрәм кунакларга чәчәкләрен бүләк иттеләр, ата-аналар алкышлавы,  кыңгырау тавышы аларның тормышында яңа чор башлануын хәбәр итте һәм алар мәктәп бусагасын атлап керделәр. 
Хәерле сәгатьтә, укучылар!