Екатерина Бистәсендә яңа ФАП төзелде

Екатериналылар бу вакыйганы озак көткәннәр һәм төзелеш эшләре башлану белән бина бик тиз күтәрелгән. Аны яз көне төзи башлаганнар иде, һәм хәзер, җәй ахырында, ФАП тулысынча эксплуатациягә әзер. Анда фельдшер, барлык кирәкле җиһазлар белән процедуралар ясау кабинетлары, балаларны, шул исәптән яңа туган балаларны кабул итү бүлмәсе һ.б. бар. Моннан тыш, бинадагы күзәтү камераларыннан алынган мәгълүматларны чыгару өчен компьютер да бар. 
29 августта бинаны подрядчы тарафыннан авыл җирлегенә тапшыру уңаеннан бистәдә Республика көненә багышланган зур булмаган тантана узды.  Яңа ФАП янында авыл халкы, район җитәкчелеге, авыл башкарма комитеты, подрядчы оешма һәм район үзәк хастаханәсе вәкилләре җыелган иде. 
-Бүген без фельшер - акушерлык пунктын төзү эшләренең тәмамлануын билгеләп үтәбез, - диде район башкарма комитеты җитәкчесе Ринат Фәсахов. - Мондый әһәмиятле вакыйганың мөһим даталар - Республика көне һәм Белем көне алдыннан узуы куанычлы хәл. Ел саен республика һәм федераль программа буенча Татарстанда яңа ФАПлар төзелә. Элек алар җайлаштырылмаган биналарда иде һәм республика аларны ремонтлауга билгеле бер финанс чаралары бирде. Әмма модульле ФАПлар проекты белән барысы да үзгәрде. Барыннан да бигрәк, яңа ФАПлар монда эшләүчеләр өчен яхшы шартлар тудыра. Ә биредә чын профессионаллар эшли, фельдшерлар авылда сәламәтлек саклауның нигезе булып тора. Биредә алар акушерлар да, табиблар да, санитарлар да, кыскасы, төрле авырулар белән һәрвакыт алдынгы көрәштә. 
 Ринат Фәсахов авыл халкын бәйрәм белән котлады, әлеге бина торак пунктны бизәп кенә калмыйча, иң беренче чиратта аның озак хезмәт итүен теләде. 
- Безнең төзүчеләр булдыралар! Болар - «Стройтранс» ҖЧҖ һәм район бюджеты акчасына төзекләндерү эшләрен башкаручы җирле подрядчы ИП Манукян. 
Авыл җирлеге башлыгы Александр Хорьков та объектны вакытында тапшырулары өчен төзүчеләргә рәхмәт белдерде. 
Ринат Фәсахов район башкарма комитетыннан Рәхмәт хатлары һәм төзелеш оешмасы вәкиленә зур булмаган бүләкләр тапшырды. 
Район үзәк хастаханәсе баш табибы вазыйфаларын башкаручы Наталья Роменская да авыл халкын котлады. 
Ул район хакимиятенә күрсәтелгән ярдәмнәре, булышканнары өчен, ә төзүчеләргә яхшы эшләре өчен рәхмәт белдерде, авыл халкына авылда туучылар санының артуын, халык сәламәтлеге буенча уңай динамикалар булуын теләде: 
- Моның өчен барлык шартлар да бар, медпунктта ике медик эшләячәк: зур тәҗрибәсе булган элеккеге фельдшер һәм март аеннан эшләүче яшь фельдшер. 
Аннары тантаналы рәвештә «кызыл тасма» киселде, бу миссияне беренчеләрдән булып Екатерина медиклары башкарды. Аннары авыл халкына яңа ФАП бинасы буенча экскурсия үткәрелде. Өлкәннәр һәм балалар, шулай ук әлеге шатлыклы вакыйгага килгән башка ФАП һәм РҮХ медиклары да заманча бина белән таныштылар. Сәламәт булыгыз, екатериналылар, бу хакта дәүләт кайгырта.