Яңа Чишмә районының барлык хуҗалыкларында орлыклар тикшерү узарга тиеш

Шул ук вакытта кайбер хуҗалыклар әлегә кадәр чәчелергә тиешле орлыкларның чәчүлек сыйфатын тикшермәгән. Алар арасында: «Зубов А. В.», «Савельев А. А.», «Дегтярев М.Н.», «Весна», «Ситдыйков Р. Р.», «Кадыйрова А. Р.», «Сәлахов Р. М.» һәм тагын берничә КФХ. Алар орлык пробаларын анализга бирмәгәннәр.

Нигездә, нәкъ менә бу хуҗалыкларда югары репродукцияле сортлы орлыклар да юк. Ә бит югары репродукцияле перспективалы сортлар үстерү уңышның артуын гарантияли (гектарыннан 4-5 центнерга).

Анализ нәтиҗәләре буенча кайбер хуҗалыкларда сабан культуралары орлыклары бик вак. 1000 бодай орлыгының авырлыгы 35 граммнан да ким булмаска тиеш (кайбер КФХларда ул 30 граммнан да ким), 1000 арпа орлыгының авырлыгы 40 граммнан да ким булмаска тиеш (ә безнең районда кайбер КФХларда ул нибары 33-35 гр.). - Әлегә вакыт бар, шуңа күрә орлыкларны өстәмә эшкәртү һәм калибрлау зарур, - диде «Россельхозцентр»ның район бүлеге начальнигы Рафис Зиниятуллин.