Чаллы Башы АМЙда "Калфаклы кызлар" бәйгесе оештырылган

«2022 ел Россиядә «Халык сәнгате һәм мәдәни мирасны саклау елы» дип игълан ителде. Шул нисбәттән Чаллы Башы мәдәният йортында «Калфаклы кызлар» бәйгесе оештырылды», - дип хәбәр итә редакциягә Чаллы Башы АМЙ мөдире Илсөяр Дәүләтшина.

-Бәйгедә  Чаллы Башы авылыннан «Чулпы» һәм  Шахмайдан «Сәйлән» командалары көч сынашты. Кызлар төрле ярышларда үзләренең уңганлыгын-булганлыгын, җор телле, акыллы, сабыр, дини белемле, зәвыклы булуларын күрсәттеләр. Һәр кыз, үзе киеп килгән калфакны яклап, шигырь сөйләде. Ризык әзерләү буенча мастер класс – видеоролик күрсәтелде, шулай ук санамыш әйтүдә көч сынаштылар. Билгеле вакыт эчендә сәдәф тагу, калфак тегү, чәч үрү, табын бизәүдә ярыштылар. Сурә укып, таң калдырдылар. Өй эшенә бирелгән 2 концерт номеры, кул эше конкурсы да югары дәрәҗәдә үтте. Интеллектуаль ярышта да кызларыбыз сынатмады. Мөселман киемендәге кызларны алиһәләргә тиңләп булыр иде.