Аграр көллиятнең Яңа Чишмә филиалында имтиханнар булып узган

29 гыйнварда Алексеевск аграр көллиятенең 2 нче номерлы Яңа Чишмә филиалында «В», «С» категорияле тракторчы-машинист таныклыгы алу өчен кабат имтиханнар үткәрелде, - дип хәбәр итте редакциягә Дәүләт техник күзәтчелегенең Яңа Чишмә районы буенча бүлек начальнигы Рәис Хисмәтуллин.

Сынаулар теге яки бу сәбәпләр аркасында имтиханнарның теоретик яки практик өлешен вакытында тапшыра алмаучылар өчен узган. Имтиханга барлыгы җиде кеше кертелгән, барысы да уңышлы тапшырганнар һәм алар барысы үзйөрешле машиналар һәм тракторлар белән идарә итүгә тиешле категорияле таныклыклар алачак.