Иң мөһиме - балалар иминлеге

Яңа уку елы башлану белән иртән һәм төштән соң урамнарда укучылар саны күбәйде. Юлларда һәм урамнарда аларның иминлеге ничек тәэмин ителә, балаларның иминлеген тәэмин итү буенча нинди эшләр башкарылган – бу хакта әңгәмәбез район юл хәрәкәте иминлеген тәэмин итү комиссиясе рәисе, район Башкарма комитеты җитәкчесе Ринат Фасахов белән сөйләштек.

- Ринат Рифгатович, яңа уку елы башлану белән балаларны юл хәрәкәте кагыйдәләре буенча мәктәп маршрутлары нигезендә йөртү мәсьәләләре актуальләшә.

- Әйе, бу мәсьәләләр даими контрольдә тора. Җәйге чорда без юллар, автобус тукталышларын, балаларны утырту урыннарының торышына инвентаризация үткәрергә өлгердек. Өстәмә юл билгеләре кую, мәктәп һәм балалар бакчалары янында, шулай ук үзәк урамнарда җәяүлеләр кичүенең юл билгеләрен яңарту буенча шактый эшләр башкарылды.

- Билгеле булганча, балаларның хәрәкәт маршрутлары «йорт – мәктәп – йорт» дип билгеләнгән. Ул ничек башкарыла, һәр җирдә дә мәктәп автобуслары бармы?

- Без бу шартларны тайпылышсыз үтәргә тырышабыз. Безнең районда 10 мәктәп автобусы бар, алар 9 маршрутка хезмәт күрсәтә. Барлык автобуслар техосмотр узган һәм төзек хәлдә. Узган ел Чуаш Чабаксары – Екатерина Бистәсе - Яңа Иванай - Яңа Чишмә (гимназия) маршрутына хезмәт күрсәтү өчен 33 урынга исәпләнгән бер яңа автобус алдык. Автобус шулай ук «Западный» микрорайонына керә, анда тукталыш ясалган.

Автобус йөртүчеләрнең хезмәт хакы түбән иде, хәзер бу мәсьәлә хәл ителде, хезмәт хакы шактый арттырылды.

Автобусларның хәрәкәт маршрутлары даими контрольдә тотыла. Шул исәптән, «ГЛОНАСС - 112» бердәм дәүләт мәгълүмат системасына (ЕГИС) тоташтырылган тахограф һәм борт навигация җиһазы эшли. Балаларны һәрвакыт укытучылар озатып йөри.

- Юл хәрәкәте иминлеген тәэмин итүгә һәм юлларның сыйфатын яхшыртуга юнәлдерелгән чараларны гамәлгә ашыру кысаларында нәрсәләр эшләнде?

- Аз эшләмәдек. Район үзәгендә җәяүлеләр кичүе урыннары урнаштырылды, «Көнбатыш» микрорайонында Савельев, Өмет, Куанычлар, Яңа күчеп урнашучылар урамнарына, шулай ук Тубылгытау авылында Яшьләр урамына, Петропавел Бистәсенең Ленин урамына, Шахмай авылында Үзәк урамга, Зирекледә Ворошилов урамына, Чаллы Башында Үзәк урамга асфальт салынды, Екатерина Бистәсендәге Профсоюз урамы һәм район үзәгендәге Совет урамы норматив хәлгә (вак таш салу) китерелде. Моннан тыш, район үзәгендә Пролетар һәм Су баса торган урамнарда тротуарлар, Әйләнеш урамында ясалма юл тигезсезлекләре ясалды, шулай ук зур күләмдә асфальт юллардагы чокырларга ремонт ясалды.

- Календарьда - сентябрь ахыры. Юлларны һәм урамнарны көзге-кышкы карап тотуга әзерләнергә вакыт җитте.

- Бик дөрес. Якын арада авыл җирлекләрендә юл-урам челтәрен кышкы карап тоту буенча хезмәтләр күрсәтүче оешмалар белән агымдагы ел ахырына кадәр дә, 2027 елга да контрактлар төзергә кирәк булачак.

Техник бирем нигезендә, подряд оешмасы тулы күләмдә инерт материаллар һәм реагентлар (ком-тоз катнашмасы, тоз, ком һ.б.), шулай ук кирәкле махсус техника белән тәэмин итәргә тиеш. Без боларның барысын да контракт төзегәндә җентекләп тикшереп, исәпкә алачакбыз.

- Эчтәлекле әңгәмә өчен рәхмәт Сезгә, Ринат Рифгатович.   

Әңгәмәдәш - Азат Мусин